كلام كبير من بنت ما تجاوزت الـ23

ممــــا اعجبــــني وبشـــدة ..
كمــا وصلــنيـ ..



;}أقرأوه للأخير ......







كما قالت احد الفتيات
السلام عليكم ورحمة الله وبركاته




حياكم الله






هذا أول موضوع لي في هذا المنتدى




ومتفائلة أنه يتثبت ويلاقي صدى حلو




لأني عارفة رقي العقليات اللي بأحاورها





أنا لي شهرين أقرأ في هذا المنتدى




وبصراحة حاسة إني بين صديقاتي




أبهرني تعاونكم




وأهنيكم على المشرفات





ندخل في الموضوع.. وراح أتكلم بعفوية وتلقائية




لأن الكلام اللي يطلع من القلب مباشرة يدخل القلب






أنا بنوتة عمري 23




تغيبت عن مجتمعنا السعودي 8 سنوات




ورجعت له من شهرين





بصراحة تفاجأت وانصدمت من التغيرات اللي حاصلة




في المجتمع بكل فئاته وطبقاته .. في النوادي الرياضية..في الأسواق..والأهم في الجامعات والمدارس..وفي المنتديات والمدونات





تمنيت أني ألقى المجتمع تطور للأمام..أو تقدم للأفضل




لكني للأسف لقيت النقيض




رجوع خطوااات للخلف..من جميع النواحي




قد يكون كلامي فيه غلظة شوي




بس يقول لك المثل




يا بخت من بكاني وبكى الناس علي




ولا من ضحكني وضحك الناس علي





تساؤلات كثيرة أرددها بيني وبين نفسي وما ألقى لها أي جواب




وأنا متأكدة أنها تتردد على كل رزين وعاقل شرواكم





هل لما زادت رفاهية الحياة يزداد تخلفنا؟؟




هل لما تطورالعلم وتسهلت الطرق له يزداد جهلنا؟؟





ليه صرنا مجتمع سطحي




لاهم ولا رؤية ولا رسالة ولا هدف من الحياة





التفكير والتركيز على المنظر والمظهر





فيه كاريكاتير أول ما شفته زعلت




لكن ألحين حسيت إنه أبلغ من كتب ممكن نكتبها




الكاريكاتير يمثل شعوب العالم




فمثل الشعب السعودي




بكرتونات مزينة وإذا فتحتيها لقيتيها فاضية




وهذا واقع البنات اليوم مظهر ومنظر




ولو تقولين لها 1 ×1 كم؟




تنحت




لو تقولين لها وش آخر كتاب قريتيه؟




قالت هااااه




"بغض النظر عن الروايات التافهة اللي طايحين فيها هالفترة"





-----------




لو نص هوس المظاهر هذا كان على عقولنا لكنـّـا أنجح الشعوب




لأنه ببساطة كل شيء متوفر عندنا

لا ناقصنا مال ولا قدرات عقلية




------------------




الأجانب فلوسهم رايحة على تعليم عيالهم وتثقيفهم وصحتهم




تلقين راتب الأب والأم ضئيل ومستحملين شظف العيش عشان يرسلون ولدهم برى يدرس شهادة عليها القيمة

بينما عندنا يستحملون الديون والأقساط عشان تسوي زواج كله إسراف وتبذير وآخرته الناس طالعة منتقدة
وإلا ديون وأقساط عشان تقول صيفنا برى شهر كامل





والله أعرف وحدة شخصيا تقول السفر بالنسبة لي عذاب لأننا إذا سافرنا




طول السفر طقاق أنا وزوجي وأنا أحرسه لا تناظر وهو يحرسني لا تناظرين ..قلت طيب خلوا سفركم لبلدان محافظة أو لا تسافرون حطوا فلوسكم في البيت تغيير ديكورات وأثاث




عصصصبت قالت خيييير سلايفي لين سولفوا أصير بينهم ما سافرت




وإلا إذا سولفوا صديقاتي إلا أنا ما سافرت وش بيقولون عني





!!!!!!!





مافيه تعليق




-----------------------




أنا لما جيت بعد هذي المدة توظفت في بنك




ولاحظت إنه إذا جت العميلة أم ساعة ألماس فخمة وشنطة قوتشي الكل يتبادر لخدمتها

وإذا جت العميلة اللي مظهرها ما فيه بهرجة.. تستجدي الموظفات يجون يساعدونها
والمضحك في الوضع إني ألاقي العميلة البسيطة ما شاء الله حسابها شي وشويات..وهذي أم البهرجة حسابها بالسالب(عليها قروض وسيارات تقسيط)..وعنوانها يا إما شقة وإلا أجار




مو انتقادي على القرض ولا على السكن انتقادي

هو إنك مكلفة نفسك بالديون والقروض عشان شويتين نظرة إعجاب من الناس
بس ما ألومك لكن ألوم المجتمع اللي صار سطحي..يحكم عليك بموديل جزمتك





----------------




أول تصنيفنا للمجتمع كان




جامعية




مثقفة




عاقلة




متربية




قليلة أدب




دينة




بنت ما ربوها أهلها




يعني كان مقياسنا




الدين والتعليم والتربية






أما ألحين




صار تقسيمنا للمجتمع




لو كلاس




هاي كلاس




بنت ستايل




بنت قروية




فعلا تصنيف متخلف رجعي سطحي




يعني رجعنا للجاهلية




وإحنا ألحين ننادي بالعولمة والعالمية والتطور والتحضر




الحضارة تبدأ بالعقول




-------------------

من جد من كثر ما أنا منهارة من هالوضع والله مو عارفة وش أكتب





أروح لنادي رياضي ألاقي ملابس يستحي إبليس يلبسها




طبعا هذا غير الاسترتشات اللي لما تتمدد يطلع البنطلون شفاف..شيء يجيب الغثيان.. المشكلة نتدرب في كلاسات كلها مرايا يعني ماتستائين من منظرك!!!!!




المشكلة إن زمان كان هذا الشيء




نكرة + قلة تربية + قلة دين





أما ألحين




عادي وكنه العيد





-------------

من أسبوعين اتصلت وحدة سعودية على فوزية الدريع قالت أنا معلمة كلمت واحد وحبيته وقال..و..و..وكملت تفاصيل حماقتها .. اللي من جد فشيلة على القنوات ينقال أنه هذي سعودية




قالت لها الدكتورة




"..وش هالخداج معلمة وهذا عقلج.. أي جيل بتخرجين لنا..وين مخج..وين تربيتج "




الخداج: هو الجنين في بطن أمه إذا تعدى الشهر الخامس




يعني تعدينا مرحلة أنهم رجعوا للمراهقة.. هم رجعوا لما دون ذلك

-----------------------------




أخذت اللغة على يد أمريكية..عاشت في أمريكا 10 سنوات من زواجها و3 سنوات في السعودية..




لأنها متزوجة سعودي




تقول أنا توقعت السعودية بتسهل علي تربية عيالي لكن اكتشفت العكس




برى لما يشوفون غلط أقول لهم هم كفار ينبسطون شوي وآخرتها النار




بس إحنا مسلمين ننحرم شوي وبنتمتع فورإيفر في الجنة




تقول وكانوا مقتنعين والأمور تمام




أما هنا لما يسألوني عن أشياء غلط يشوفوها في الفيصلية"والله كلامها نصا" أتلعثم وما ألاقي حجة مقنعة طبعا هم يعرفون كيف يحاورون عيالهم ما تقول له إلا كلام مقنع ومنطقي شوفي مخ عيالهم ومخ عيالنا





نرجع لها تقول صرت أقول لهم




"there are good muslims & bad muslims"




----------------------------------




فيه صرح رائع في عالم المنتديات اسمه مملكة المرأة




99% من مواضيعه عن المظاهروالشكل




هل عالم المرأة في قطعتين الملابس اللي تلبسها؟؟

لا وكل مالها تتقلص هذي القطعتين




وين ثقافة المرأة؟ وين أساليب الحوار؟؟ وين القضايا الدينية اللي تخص المرآة؟؟




------------------------




يا كثر ما نسمع




ماتوقعت الزواج كذا ؟




انصدمت بالحياة اليومية في الزواج؟




ما قدرت أفهم زوجي.....





عارفين ليه لأن منتدياتنا النسائية




ثقافتها





"بسررررعة بنات وين ألقى بانتي أحمر ..عشاني بألبس في الحفلة لوو ويست"





وإلا






"مين أفضل مركز ينظف لي البكيني بالليزر؟؟"





صارت البكيني منطقة عادي تطلع؟




تتقلبين على السرير بمنظر مقزز ومقرف.. وبدون ولا نقطة حياء؟؟




والله لو أمك اللي بتشيل لك بالليزر كان استحيتي




وين الحياء؟؟




مات؟؟




وإلا نخنقه عشان ما يسيطر على تصرفاتنا؟؟




وإلا اللي كان ماسك البنات شدة الأهالي؟؟ لما خفت شفنا الهوايل؟؟




وإلا الدين انحصر في صيام 30 يوم في السنة و5 صلوات في اليوم بس؟





كلها 8 سنوات تفاجأت وانصدمت




وما أدري متى أقدر أستوعب هذي التغيرات




اللي أتمنى تتعدل للأفضل ولا أحتاج أستوعبها






أتمنى أنها تكون نزوة وقريب تتلاشى وتصير ذكرى أليمة في الماضي ونقول كنا وكان




أتمنى يصير الخطأ شيء عيب ما نتفاخر به ونعتبره مقياس على مدى حضارتنا




--------------------------




ليه صرنا نستحي من الدين ومن العادات




"أنا أتكلم عن العادات الصح مو المتخلفة"




تجي كوافيرا تقول لو ما عندك تحفظ على الإكستينشن أعمليها




!!




صارت المسألة تحفظ؟




صار اللعن أمر قابل للنقاش والتحفظ؟




صار الوصل ينصح به في المنتدى على مسمع من مايزيد عن خمس مية بنت




وياليت وحده ردت وقالت حراااام




من واقعنا الكوافيرات أغلبهم نصرانيات عقيدتها المسيح ابن الله




بس الشرهة علينا إحنا يا أمة لا إله إلا الله




لو ما كانت شايفة جرأتنا وتمردنا على الدين ما قالت كذا




هل كان التوصيل قبل عيني عينك يكتب في بروشور الصالون؟؟ جنب السشوار والتسريحة..





لو أقدم لك كريم وأقول لك لو ما عندك تحفظ على السرطان جربيه تراه يبيض




وش ردة فعلك؟




فيه ردة فعل غير إنك ترمينه علي..وتنبهين قرايبك منه .. وتحذرين البنات في المنتديات




---------------------------

وحفلات التخرج وحفلات النجاح والدي جيهات والزواجات
كلها معازف وأنواع التفنن موسيقى وعود وأورج
وإلى آخر الليل وإلى الثلث الأخير.. وعادي .. ما فيه اللي يقول للغلطان تراك تماديت بالغلط
آخر الليل إذا ربي تفضل علينا ونزل لسمانا الدنيا
هل من داعي؟ هل من مستغفر؟ هل من تائب؟
عذرا يا رب إحنا مشغولين مع محمد عبده وأحلام
دوروا الدنيا بكل أبعادها
هل فيه ملك ينزل لك كل ليلة ويقول لك " تبين شي؟ "
أتفه ملوك الدنيا تلقين عنده 10 سكرتارية وبينك وبينه 10 أبواب
والدخول عليه بموعد إن كان يتنزل يقابلك من الأساس
أعجبتني عبارة لداعية مصري قال:
" ربنا ينزل كل يوم ينادي حد عايز حاقة.. وإحنا مشغولين عنه.."
----------------------





تجيك الوحدة تشتكي وقريتها هنا في المملكة



تقول ياربي أنا كنت أكلم واحد وحبيته




ولما تزوجت ما حبيت زوجي وتحملت قلة حبي له وبعد كذا اكتشفت إنه يكلم وحده وانهارت أعصابي




طيب.. وين الغريب في الموضوع




يعني قمة الخبث والخيانة




خنتي أهلك وربك وتبين واحد طاهر.. نظيف... قلبه عذري




مافي حياته إلا أنتي




وأنتي في حياتك عشرة قبله




عجب




!!!





--------------------------------




هذا غير الصور الشخصية وعبارات وصورالتوقيعات اللي كلها إيحاءات سيئة وسخيفة




وفيديوهات التوقيعات هذي لها نصيب الأسد في السوء





إحنا أرقى من كذا




أبصم بالعشرة أن كل قارئات موضوعي هذا متعلمات.. جامعيات.. أو في طريقهم للجامعة




ليه أحط صورة فاتنة لو مر عليها ولد حركت غرايزة




لا تقولين هذا سيكشن خاص بالمرأة




أتوقع كلنا سعوديين وأعرف الناس بشبابنا




قولي هنا ريحة حرمة وشوفي ردة فعلهم





وحتى؟أغلب العضوات يكتبون في أقسام أخرى والتوقيع والصورة ثابتة




لا تقولين هو لو يبي يشوف شاف




ما عليك منه عنده رب يحاسبه..بس لا تكونين سبب




يجي الشخص يوم القيامة تعرض عليه أعماله السيئة




أنتي كذبتي




أنتي أظهرتي مفاتنك لرجل




أنتي أخرتي الصلاة في اليوم الفلاني




أنت..




أنت..




أنت زنيت




يقول يا ربي ما زنيت




يقول له لكنك ساعدت أحدهم على الزنا




وكان عليك مثل وزره




والآية صريحة وحمدلله إننا عرب نفهمها بدون مترجم:




" ليحملوا أوزارهم كاملة يوم القيامة ومن أوزار الذين يضلونهم بغير علم ألا ساء ما يزرون"






هذا إهداء للبنات اللي يدخـّـلون الشباب للأسواق في أيام العوايل لما يمنعهم السكيورتي




هو بيدخل ويرقم وتبدأ علاقة أنتي السبب فيها





وهذا إهداء للي تدل على مواقع سيئة





وهذا إهداء للي ترسل رقم واحد لزميلتها





الواحد يالله يستحمل ذنوبه.. يروح يشيل ذنوب الناس





والرسول صلى الله عليه وسلم يقول




" أيما داع دعا إلى ضلالة فاتبع فإن عليه مثل أوزار من اتبعه من غير أن ينقص من أوزارهم شيء وأيما داع دعا إلى هدى فاتبع فله مثل أجورهم من غير أن ينقص من أجورهم شيء "




أخرجه مسلم




--------------------------




والموسيقى اللي صارت زي السلام عليكم

أصلا صارت هي التحية والافتتاحية في المواضيع




في المنتدى سيكشنات مخصصة للأغاني




!!

وكأن الأغاني عادي مثلها مثل تبادل الأخبار وأسعار الأسهم




أفتح مواضيع هنا في مملكة المرأة




إلا مقطع الصوت تلقائيا شغال أورج




يعني بالقوة؟




ما دخلت سيكشن الأغاني..بس برضو مضطرة أسمعها؟




وهذا تجاوز للحدود والحريات




والمفروض يكون أحد شروط كتابة المواضيع منع هذا الشيء




لو بأنزل طبخة في وسط موضوعي




قلتوا: خير؟ غلطانه الأخت في العنوان





وبالنسبة للبنات اللي ينزلون زفاتهم الموسيقية




كم وحدة مرت على الموضوع من الأعضاء وسمعتها




+




كم وحدة مرت على الموضوع من الزوار وسمعتها




+




كم وحدة بحثت في قوقل وطلع لها موضوعك




+




كم وحدة أعجبتها الزفة وحطتها في زواجها اللي بتحضره 400 مدعوة





وعداد المعاصي شغال في ظهرك




وياطول الحساب




----------------------




زميلاتي في ثانوي لما شفتهم




من كثر ذهولي




صرت أشك في نفسي




يعني لو وحده تغيرت تزعلين ويضيق صدرك عليها




لكن لما 6 كلهم تغيروا




وش ردة فعلك إلا العجب






لا.. وأمر الحواجب هذا أمر عجيب




ما أدري هل نزلت بعدي فتوى جديدة بجواز النتف؟




نتف وتاتوو .. والضحكة شاقة فمها.. وكأن شيئا لم يكن




لو أقولها الله يلعنك بتزعل




لكن رب العالمين يمسـّـيها ويصبـّـحها على لعنة




إتز أوكي عندها





وإلا تجيك أم 14 سنة توها داخلة عالم النتف"عالم اللعن" أسفل حاجبها كله أخضر





فعلا.. صرنا على قول المصريين




نضحك على خيبتنا




-----------------------------




أما حكاية العبايات هذي يعني من جد كارثة




أقابل ربي في الصلاة محجبة




وأقابل الشباب في السوق بالعيون اللي فيها كيلو مكياج والغرة المنسدلة




أي تناقض هذا؟




أي ديانة هذي؟




أي أخلاق؟




عبايات وإلا فساتين؟





القضية اجتاحت حتى الأمهات




حريم كبار والله الشعر اللي فوق أذنها بدى يغزوه الشيب وتقول لي




تعرفين غرز الكروشيه بأحطه في عبايتي




يعني خافي الله في هالشيبات

جده والله العظيم




وش بقيتي لبناتك المراهقات

إذا أنتي بتزينين عبايتك بورد كروشيه
ماألومهم لو طلعوا من غير عبايات




------------------------




عشت في المجتمع الإماراتي حول سنة ونص




أحنا عارفين إن أهالينا محافظين أكثر منهم




وبلدنا محافظة أكثر




وموادنا الدينية في المدارس والجامعات أكثر





بس شوفوا حياتهم وتفكيرهم




كل بنت لها خطوط حمراء




هي حاطتها ومقتنعة فيها وفخورة بها




هناك المحجبة ترفع راسها بحجابها ومحد قدها




وعندنا هنا اللي عبايتها ساترة ناقص تدخل في الجدار من الحياء




تخاف يقولون عنها متخلفة




ياإنها مسوية كابوس هذي الكلمة للبنات




تذبح أمها وأبوها بس لا أحد يهمس بكلمة متخلفة




هناك تلقين البنت تقرأ كتب عليها القيمة

مثل
"ذا سيكرت - نساء من الزهرة- أسعد امرأة في العالم- سلسلة شوربة الدجاج..."
هنا تلقين في يدها رواية للهابطين اللي خسارة أكتب اسمهم هنا




-------------------------

نقطة إضافية
البلوتوثات والهوايل اللي فيها
العين تزني وزناها النظر
لو أقول لك شوفي فيلم إباحي قلتي لا حرام
طيب وهذا
ليس إلا اقتباس لأقذر ما في الفيلم
!!
رسايل الجوال والنكت الجريئة
والله لو أقول لوحدة قولي الكلمة السوقية الشوارعية هذي بلسانك
قالت مستحيل بس لما تنكتب كرسالة جوال تصير كلمة عادية
لا ومضحكة بعد..تسمعين الضحكات الرنانة ..
ما أدري هل القذارة صارت تضحك؟؟
والله لو ولدك وإلا أخوك قالها
كان صرختي: عيب عليك ترى بأحرقك بالنار عشان تتأدب
----------------------------
قبل أي فعل تقدمين عليه
لا تحكمين إيمانك لأن يمكن إيمانك ضعيف في هذي الفترة أو يمكن لا سمح الله أنه ما فيه إيمان في هالفترة
إحنا عارفين عقيدتنا تقول الإيمان يزيد بالطاعات وينقص بالمعاصي




ولا تحكمين قلبك لأنه ممكن قلبك يكون قاسي في هالمرحلة






حكمي عقلك لأن العقل هو نفسه ما يتغير




قولي هل لو كنت مريضة لا سمح الله بأسوي هذا الشيء

إذا الجواب إيه

أقدمي معناها إنه حلال وخير ولا تستحين منه إذا قابلتي ربك





وإذا الجواب لا

معناها تراك تجاوزتي حد مع ربك.. وبيكسر هالشيء عينك أنك تقابلينه وأنتي مسويته..




أي عمل قولي هل لو سويته بيكسر عيني مع ربي لو بأقول يارب اشفني وإلا يارب عطني





--------------------------------------

دعوة عملاقة أبعثها من هالمكان الراقي




حملة أتمنى نبدأها ونكون قدها ونوصلها ونسمعها الجميع




كفى..استهتارا




كفى ..تراجعا




كفى ..تنازلا





قومنا حملة لا للكوافيرات الغاليات ونجحت




وقومنا حملة السعودية للسعوديين فقط ولقت صداها





شدوا الهمة وساعدوني




أثروا الموضوع بردودكم الهادفة





يا صاحبة الدين..أضيفي كلمة تشهد لك يوم القيامة..مو الدين في غرفتك تصلين وتصومين وإذا شفتي الغلط غمضتي عيونك وسكتي عنه..هذا اسمه شيطان أخرس






ياصاحبة العقل الرزين..أدلي بدلوك.. نورينا بآرائك الهدافة






ياصاحبة الثقافة..ساهمي في تثقيفنا






هذا اللي جرأ بنات الغلط على المجاهرة..وهو إن صوت أهل الدين والعقل والرزانة واطي




علوا أصواتكم خلونا نسمعها ونسمّـع غيرنا




-----------




نبي وحدة تكون شجاعة وسباقة للخير




أكتبي هنا أنا غيرت صورتي الشخصية أو توقيعي




يله عشان تشجعين غيرك ويحذو حذوك




وتأخذين أجره




----------




نبي وحدة شجاعة نبيلة تقول أنا مسحت موسيقى كنت منزلتها في موضوعي




أو زفة نزلتها للبنات




-------------------------




نبي وحده شخصيتها قوية تقول أنا مسحت صور شهيرات هوليود من موضوعي لأن ملابسهم عارية




نقدر ننزل صور بتضليل خفيف يكسر جرأة الأفخاذ والصدور اللي طالعة




---------------------------------

خلوا شعارنا




الرجوع عن الخطأ خير من التمادي فيه




--------------------------






حقوق الطبع غير محفوظة




أنشروا في المنتديات والمدونات والإيميلات




خلونا نرتقي بمجتمعنا




خلي لك بصمة في الحياة




-------------------------




يارب هذا أقل ما يمكن أسويه




بس أتمنى أنك تعذرني به




أنا وكل من خطت حروفها هنا إنكارا للواقع المرير




محاولة بسيطة للتصحيح.. تقبلها مننا يارب




-------------------------

لا تقولين المجتمع كبير ومتنوع وصعب أصلحه
المجتمع هو
أنا وأختي وأنتي واختك وهذي العضوة واختها وبنات خالاتنا وبنات عماتنا





والسلام عليكم





-------




مخرج





أصـدر المولـى بــيـانه . . . أيــن أنـتِي يـافــلانــه




إفــتحـوا ديـوانـها ولــ . . . تــنـظروا في كـل خـانه




موقــف صعـب رهـيب ... أسـأل الـله الإعانــــة




حيـــن أدنو من إلهي ... دون ستـر أو بطانـــة




يحاكيني جهارا ... كيف أديـت الأمـــــــــانة




حــيــنهــا تشـعر مـثـلي . . . أنهـا حقـا جَبَـانـه




كـم قـضـيت الـعـمـر هــدراً . . . بيـن غـيٍّ ومَـجَـانــه




يـا لـقـلـب الـسـوء أرخى . . . لــلـهـوى الــعَاتِـي عَـنَانَه




فــي متـاهـات الـمـعاصي . . . يــخـسر الــقلبُ رهــانَه





مـن يـجـيـب الله عنـي؟! . . . مــن سـيـعـطـيـنـي لــسـانـه





لـحـظـة مــن هـولـها لا . . . يـملــك الــعـقل اتــزانــه




ضــاع مفـتـاح الــنــهـى . . . واخــتَّـل مـيــزان الــرزانه





====================

موضوع ,,!!ْ~

ابداع x ابداع ,

انا , ع نفسي , مارح ازيد , ع كلامها , وص كلامها , انا اسويه , بصراحه

بس ابعلق , ع مسائلة النتف , انا قبل كذا يوم , اكلم وحده في الماسن ,

قالت لي برب ابشيل حواجبي , قلت كيف وانا منصدم , قالت ابنتفها , شكلي غبي الحين
قلت , لها , ترا تصيرين ملعونه , وجبت لها الايه ,
قالت ياشيخ , برب بس , يعني شفتو كيف الحين عادي مره استغفر الله

شهد , شكرا ع نقلك

فيه كلام كثير ودي اعلق عليه .. لكن اوافق اللي طرحت الموضوع ان فيه مخالفات للبنات كثيره .. وخصوصا ان اي مشكله في العالم او تخلف او سطحيه او تفاهه تاكدي ان وراها بنت


لكن ايضا انا زي ما اوفقها في كثير من الموضوع اختلف معها في النقطه الاخيره .. حقت شيلوا الصور يمكن البنت تنفتن .. ذكرتي بشيخ قصيمي انتشر له مقاطع على اليوتيوب يقول يا الرجال حاولوا تشينون انفسكم عشان ما تفتنون الحريم !!!


مسألة اني بشيل الصوره الشخصيه و التوقيع ومدري ايش .. الا ورا ما نقفل المنتدى لانه يجمع بين الحريم والرجال .. ورا هي ما تلغي عضويتها يمكن في يوم من الايام تنفتن ..

الواحد المفروض انه يعرف يميز .. واللي بتنفتن من صوره شخصيه الله يعينها اجل ما شافت خير ابد ذي المفروض ما تطلع من البيت


عموما هي تكلمت على اشياء سطحيه وانا اشوف ان فيه بعض من السطحيه في نظرتها للمجتمع .. وعموما زي ما قالوا قديما (( مزمار الحي لا يطرب )) .. اي شي عندنا نبحث عن انتقاده .. واي مجتمع دايم ينتقد العادات الشينه فيه ويبرزها

عموما ما اختلف معها في كلامها اجمالا .. فعلا النساء هم سبب في تسارع عجلة الجهل .. ومتى ما ثقفناهم راح يتطور المجتمع .. ويتركون عنهم المنظار .. والتميلح وحب الترزز .. وحنا اقوى شي بالعالم .. لكن نقطه يمكن هي اللي استغربت طرحهاا .. وعلقت عليها


وشكرا على النقل بس اتمنى نفكر بعقولنا .. و ان موب كل من دخل علينا من نقطة الدين انجرينا وراه .. دخلو علينا قبل اول ما طلع الجوال ابو كمرا .. ثم دخلوا علينا بالبلوتوث .. ثم دخلوا علينا بالسينما .. وكل ما جيت تسوي شب في الدنيا جاك واحد قالك يا اخي فتنه .. والله الفتنه وجودكم

يا شباب ترا موقع اليوتيوب حرام .. لان فيه صور رجال وفيه صور حريم .. الهوت ميل حرام فيه صور حريم .. وبعدييين الى متى !!!

آلعــفــو .. هذ1 أقل شي نسويه .. عشآن نحآول نصلح الوضع أنا عن نفس تأثـرت ..
وبـعدين ذي أستغفر الله .. تجيب لها الآيه تقول روح بس .. <<للحين مو مستوعبه وش تحس به يقال لها بترضي الناس .. وتتزين يعني .. ؟! طيب ربي ما رضى عنك تيلي لو تشوهتي
متخلللللللفة .. تو متش مدري كيف تكلم هالأشكال
المهم

ي :يعطيك العافية ع المرور

س:سلمت الأيادي اللي ردت ع الموضوع

ل: لا تحرمنا من مرورك

م :مبدع دوما في حوارك

و: و الله انك رائع <<خربتهآ

باختصار .. هذي هي ما تعنيه كلمة يسلموووو ..

دخلو علينا قبل اول ما طلع الجوال ابو كمرا .. ثم دخلوا علينا بالبلوتوث .. ثم دخلوا علينا بالسينما .. وكل ما جيت تسوي شب في الدنيا جاك واحد قالك يا اخي فتنه .. والله الفتنه وجودكم

فهد الله يصلحك في كل موضوع رازها لنا ..
إذ1 أنت ما تنفتن بالصورة ..
غيرك يننفتن ويخق بعد .. فيه صور مال أومها داعي ..
بالنسبة لي أحس الصورة تعر عن شخصية البنت أو الولد ..
لما أشوف بنت حاطه صورة babey ولا وردةوصورة حلوة كذ1 بدون صور مالها داعي أحسها أنسانه عاقلة !
أنا أنقهررررر بالذ1ت من اللي .. تحط صور الـ lip .. وش تحسسسسسس به ليه تحطينها ابي أفهم أنا ؟؟
يعني حتى بعض الأولاد يجلس علق على صورة البنت بالمنتدى الله صورتها حلوة البنت اللي فيها حلوة!!
وثاني شي أنا ما قلت رح يالولد شين نفسك ؟؟ أنا قلت ؟؟ .. << طيب بتقو لي حتى حنا يمكن نفتنكم ؟
بسسس الولد غيييير ... مابي أغوص في أشياء مالها داااعي .. يعني كلنا نعرف أنه شهوة الرجل أقوى من شهوة آلمرآة ؟
وهذي حكمة ربي في أنه حرم للرجال يشوفون الحرمةطبعا غير محارمهم
وعدي حكيكثييير بس ما راح أطول ..
والعفو فهد ومشكور على مرورك ..وأخيرا هذ1 رأيك وأنت حرررر .. وهذ1 اللي تنظر له وجهات نظر !

أول شي أن الجسد اللي يفتن ما عمري شفت ورده تفتن بصراحه ..
ويوم تقول الرجل .. زي الحرمه لا مو زي الحرمة!! زي الحرمة في أنك لما تجي تتعامل معاهم هنا تساويهم في نفس المعاملة لكن تجي وتقول لي أنهم نفس بعض لا والله مو نفس بعض .. طيب ليش ما كلنا .. جلست مع الأولاد ومن بوي فريند لبوي فريند وأقول لا كلنا نفس بعض .. ؟
وطيب ليش الرجل بس اللي حلل له الشرع يتزوج ربع ليش مو الحرمة ..؟
وليش الرجل هو اللي يده الطلاق مو الحرمة << تقدر تقول أنهم متشابهين ؟؟؟!!!

وهذ1 دليل
فأنكحوا ماطاب لكم من النساء مثنى وثلاث ورباع ؟؟؟ << بصراحه أعتبره دليل على أنه شهوة آرجل أقوى ..

وبعدين مو شرط تفتنك الصورة ؟!! هذي حدود ترى ؟؟ أنا قريت وسمعت أن حرام ليش أروح أعاند ما راح يضرني شي ؟

(إن العين تزني وزناهما النظر وإن اليد تزني وزناهما البطش .. وإن الأذن لتزني وزناها السمع .. (((وإن الفرج ليصدق هذ1 أويكذبه))) ..

وعمومآ
حبيت ذكر بس ..(وذكر فإن الذكرى تنفع المؤمنين )

ياجماعة صلوا على النبي



أتمنى ان الموضوع ماياخذ منحنى آخر بعيد عن صلب الموضوع , وتأكدوا أن أي نقاش بيبعدكم ويجركم لمواضيع ثانيه !


أتكلم عن الموضوع نفسه ..
ماأشوف أن البنت تكلمت عن الدين بصورة رئيسيه .. مجملاً تكلمت عن العادات والتقاليد والتغيير الحاصل في المجتمع ..

وهذ شي صحيح ومافيه اختلاف عليه ..
يمكن أنها تكلمت من غيره وحرقه وجابت امثله كثيره نتفق في (أغلبها) ونختلف في اثنين ثلاثه أنا معك يافهد !