وظائف شاغره خاطبات وخاطبين...

السلام عليكم ورحمة الله وبركاته

في وقتنا الحاضر لانستغرب اي قرارات تصدر ( حتى لو قالوا وفق خطط مدروسه) انا لا اعرف الية دراسة اي مشروع قرار او اقتراح، فالواجب ان ننظر للايجابيات والسلبيات قبل اتخاذ اي قرار، لذا نجد قرارات تصدر وبعد فتره يتم التراجع عنها وهذا يدل على ان هناك اناس غير موهلين يحلولون الاجتهاد وهم بصراحه يتخبطون بالاجتهاد.


ناتي لصلب الموضوع اليكم هذا الخبر:-

40 حالة طلاق يوميا.. و1.5 مليون فتاة تجاوزن سن الزواج
لأهميته في مجتمع لا يسمح بالاختلاط بين الجنسين
سلمان الضباح ـ بريدة
دعا أمين عام مركز «رؤية» للدراسات الاجتماعية في محافظة الرس في منطقة القصيم الدكتور إبراهيم الدويش، إلى استحداث دبلوم علمي وشرعي متخصص في الجامعات والمعاهد السعودية يتم اجتيازه لمن يرغب العمل بمهنة خطابة وخطاب، بحيث يكون لها ميثاق شرف. وطالب الدويش في تصريحات له أمس، الاعتراف رسميا بمهنة الخطابات والخطابين، وأن تشملهم مظلة الإشراف الحكومي مثل أي مهنة أخرى، واستخراج تصاريح رسمية للعاملين بها. وأوضح الدويش أن هناك زيادة مطردة في عدد المشاكل الأسرية التي تنتهي غالبا بالطلاق، مشيرا إلى دراسة سكانية أجرتها وزارة التخطيط مؤخرا، تفيد بأن عدد الفتيات السعوديات اللاتي تخطين سن الزواج قد بلغ 1.5 مليون فتاة في عشر مدن، واحتلت العاصمة المقدسة المرتبة الأولى بواقع 396 ألف فتاة.
وأشار الدويش إلى أن الدراسة أكدت ارتفاع سن الزواج للجنسين وزيادة الخلافات الزوجية والعنف الأسري، وارتفاع حالات ومعدلات الطلاق في المجتمع في الفترة الأخيرة إلى 15 ألف حالة سنويا أي بمعدل 40 حالة طلاق يوميا. وقال الدويش إنه في ظل مجتمع محافظ كالمجتمع السعودي لا يسمح بالاختلاط بين الجنسين تصبح مسألة اختيار الأزواج صعبة وبالتالي فإن مهنة الخطابات والخطابين تكون إحدى وسائل الحل، بشرط أن لا تخضع إلى الاستثمار والكسب بشكل يؤثر سلبا على الزوجين والمجتمع.

------------- انتهى الخبر ----------

طيب يادكتور ليش ما يكون هناك منهج لدراسة الثقافه الزوجيه وفق الضوابط الشرعيه يدرس في مدارسنا نعلم ابناءنا حقوق الزوجين وكيفية التعامل بينهما وما هي سلبيات الطلاق، يكفينا فخرنا سيرة رسول الله صلى الله عليه وسلم في معاملته مع زوجاته، عندما تدرس مثل هذه المناهج في المراحل الابتدائيه حتماً ستكون مبداء يرسخ في الاذهان لكل الجنسين ويستمر تدريس المنهج بتعمق في المراحل المتقدمه.

اطرح بين يديكم هذا الموضوع

هل الحل لتغلب على مشكلة نسبة الطلاق .....
تعين خاطبات وخاطبين ؟؟ ام ادخال مناهج تعلم الثقافه الزوجيه ؟؟ ام هناك حلول اخرى فلا نستغني عن ارائكم ؟؟؟؟؟؟

تحيتي للجميع

أنا أقول مثل ماطبقوا الفحص قبل الزواج
والزواج مايتم إلا بعده
مفروض يحطون دورة للمقبلين على الزواج
يثقفون فيها الزوجين
ومايتزوج إلا اللي يجتازها

الاخت/ نوسه
منطق عقلاني وسليم
ولكن تخيلي معي اني ذاهب لاخذ دوره ماقبل الزواج
وادخل على محاضر يشرح لي كيف اعامل زوجتي،
احس انه صعبه شوي لان عندك مجتمع الكل يدعي انه فاهم كل شي.
وكما قلوا العلم في الكبر كالكتابه على البحر
ام العلم في الصغر كنقش على الحجر
فاذا انشاءنا جيل يومنون باهميه الحياة الزوجيه وواجباتها من الصغر
فان شاءالله اننا ستحصل على ذلك......
انرتينا بافكارك النيره، انار الله طريقك
تحيتي لك

والله صعبه صراحه .. يا اخي تبيني قبل اتزوج اروح ادخل محاضرات .. يا اخي هذا كنه الاسبوع الالزامي اللي للرخصه .. تقلى الواحد يعرف يسوق .. بس يبلشونه باختبارات واسبوع لازم كل يوم يروح يحضر محاضره مع مدرس مصري .. يقوله شوف بأه يا ابني ما تلفش الا من اليمين للسيار .. و باقي المحاضره سواليف وش ازين مطعم


انا برايي ان عادات المجتمع تساعد على ان الواحد ما يفهم زوجته الا بعد الزواج .. يعني لو انا مثلا حرمه صدقني اقدر اوصل لزوجي صوره ثانيه عني غير الحقيقه .. عشان كيذا انا أيد ان الواحد ما يتزوج الا عن حب .. وجهة نظري طبعا


يعني لو فرضنا الزواج التقليدي .. انا اسميه (( صن مغطى )) .. اللي يعرف البلوت بيفهم كلامي .. يعني ما تدري انت وش الورق اللي في يدينك .. اهلك يخطبون لك على المواصفات اللي طلبتها .. بس كا عقليه و كاتفكير تلقى البنت ما تناسبك


بعدين الحين لما يخطب الواحد من ناس .. تلقى اهل البنت محجرين لك .. ما تكلمها بالجوال كل شوي .. عاد اذا ابو البنت بثر الله يعينك .. ما تزورهم في البيت الا مره بالاسبوع .. ويكون فيه اثنين من اخوانها جالسين معكم .. تحس انك قاعد تقابل مسجون وفيه حراس عليك


ليش انا اتزوج وحده ما اعرف عنها الا ان ااهلها ناس طيبين .. وشكلها كيذا ..

قصيمي تصدق ان الشوفه الشريعه قبل الزواج ما تتهنى فيها .. والله العظيم واحد من اخوياي يقولي دخلت بشوف حرمتي .. لقيت في المجلس 7 من اخوانها جالسسين يناظرون فيني .. دخلت علي حطت عصير ومشت .. وانا خايف ارفع راسي اخاف انجلد


اوكي بيجيك واحد يقول الحب يجي ما العشره .. طيب يمكن انا ما اقدر اعاشرها .. اطبعها ما تناسبني .. بتقول وقت الخطبه بقول لك ما يبين .. ما يمديك تتعرف عليها الا انت متزوج


طبعا يمكن يقول واحد فيه ناس تزوجوا عن حب وتطلقوا !! .. بقول له ممكن لكن صدقني ما راح تكون نسبه اعلى من اللي حاصل الان

لانك ما راح تختار وحده الا وانت معتقد تماما ان كل شي فيها يصلح لك


صدقني حنا اتعبنا التنظير .. يجيبون لك ناس ينظرون ويسنون قوانين وفي النهايه .. ما يمشي الا الواقع

يعني تدرس الواحد مثلا اهمية الصلاه .. و و و و .. وتقعد تحشيه .. وفي النهايه ممكن تلقاه ما يهتم في الصلاه .. ليش لان التدريس يعتمد على الحفظ و درجة النجاح .. فرغوا ذهن الطالب فاضي تكلمه عن الزواج وهو صغير !!

وشكرا

استاذ فهد الغالي
لقد ناقشت المشكله بمنطق واقعي
ولكن لم تضع حلول الا ان يكون الزواج عن حب
وهذا مستحيل في مجتمعنا الا بحالات استثنائية.
فكيف يكون هناك وعي بحقوق الزوجين، كيف نربي الاجيال على ذلك؟؟
الاسره طبعاً لها تاثيرها، اما سلباً او ايجاباً، ولكن حينما نضع مبادي
وافكار ترسخ في اذهان الصغار عن حقوق الزوجيه، فقد نصل الى نتيجه ايجابيه
في المستقبل.
لك تحيتي