قصتي تدور حول ( ولدين تؤم)
نايف ونواف
نايف اكبر من نواف بـ 3 دقايق
..
في ايام العطله اللي محد يطفش فيها
نواف ونايف
في الخيمه الملجاء الوحيد اللي يحبونه كل الشباب
نايف ونواف جالسين
نايف: مره طفش
نواف: وش نسوي المشكله اجتماع الشباب بعد 9
نايف: والحين 5 العصر .. اوف وش الحل
نواف: نايف
نايف: هلا
نواف: تتذكر شريط الفيديو اللي سجلنا فيه
يقالي اننا في مقابله
نايف: أي واحد
نواف: اللي اول ما تخرجنا من الثانوي
نايف: ايه ايه ش فيه
نواف: كم لنا ما شفناه
نايف: بلا دلاخه اول ما تخرجنا من الثانوي احسب ويطلع لك
نواف: اشتقت اشوفه
نايف: انقز لا هنت وجبه
نواف: باطير مو انقز بس .. بشوف ايام صرقعتي
نايف: يقالي عاقل الحين
نواف: الحين احنا في ثالث جامعه .. يعني سنتين
عساني القاه بس
نايف: فوق الدولاب حقي
نواف: طيب ثواني ونرجع من ثاني
نايف: لا يكثر بس
..
بعد ربع ساعه رجع
نواف: باك
نايف: احلى باك
نواف: يسلمووو.. ما بغيت القاه اوف
نايف: لو تدور على كنز طلع
نواف: اقولكم من الحين بدون ضحك الاني احس شكلي غبي
نايف: ومن قال الحين ذكي
نواف: تراك تشبهني يعني تسب نفسك
اووووص بس بدا العرض

..
اشتغل الشريط..


نايف ونواف الولدين الوحيدين الاهلهم
نايف ونواف
يشبهون بعض بـدرجه ما تتخيلونها
لدرجه امهم وابوهم ما يفرقون بينهم
يتشابهون في طول
الشعر الطول الجسم لون البشره
كل شي كل شي

لهم مواقف مره خطنطر راح تكون بلسان نايف ونواف
..
..
نايف:
انا راح اتكلم بما اني اكبر بـ 3 دقايق
احم
انا وتؤمي نواف عايشين في غرفه واحده
ولنا سياره وحده
مو عشان ابوي ما يقدر يشتري
لا ما يقصر الله يخليه لنا
بس احنا اصلا دووم مع بعض
واحيانآ يسوي لي قلق في الحياة بس وش اسوي اخوي الوحيد
وكل اسبوع لنا خطط جديده نستهبل فيها
والمايك مع نواف
نواف:
يقولون اني صغير
حتى احيانا امي تقول لـ نايف
انتبه اخوك نواف
يعني وش شايفني بزر
والا في المتوسط
بقولكم قصه صارت لنا في ثالث ثانوي
انا ونايف في فصل واحد
ومسوين زحمه والطريق فاضي
دايم الاستاذ يقول نايف انا اوقف
فجاءه يقول نواف انا بعد اوقف
هو يعصب
حدد موقعك من الاعراب انته وهو
تراه مصري
وتدرون وش امنيته في الحياة
اني يفرق بيني انا ونايف
دووم احنا نرد عليه بصوت واحد
ما فرقوا امي وابوي
تفرقنا انت
..
دايم المدرسين يتعقدون
طبعآ كله في الفصل الاول
يوم جاء الفصل الثاني
جاني المرشد قال ياللا يا نواف رح لفصلك الجديد
نواف: أي فصل وهذا وشو
المرشد: اللي صار في الفصل الاول ما ابيه يصير في الفصل الثاني
نواف: والله ما اروح الا نايف معي
المرشد: ما اكون خالد المرشد اذا ما خليت كل واحد في فصل

انا عصبت بصراحه من كلمته خير يقولي كذا
<بلا هياط بس

واخر شي قررت اروح فصل جديد
مع خطط جديده

يوووه تعبت ياللا نايف كمل
..
نايف :
لو سمحت قول اخوي الكبير نايف عيب احترمني لو قدام الناس
..
المهم اقولكم سوينا خطه يوم راح نواف فصل جديد
اصلا تبون الصدق فكه منه
<قلب على اخوه هع
قررنا اذا صار في اختبار شهري
مثلا لماده الكيمياء
انا اختبرت قبله
اذا جاء يوم اختباره اروح انا فصله ولا من شاف ولا من دري
واصير مذاكر ومخلص
وهو يسوي نفس الشي
لا صار مختبر في ماده قبلي
بس تبون الجد
والا عمه
ما فلحنا في النهائي بغينا نجيب العيد
بس حمد الله تخرجنا بنسبه حلوووه
حتى في تسميع القران.. كل واحد يحفظ له جزء معين..
..
تصدقون انا ما ارحم في المدرسه الا راعي البوفيه
ياهو متعقد اروح اطلب طلب
فجاء يجي نواف يطلب

عيونه تطلع شبر قدام توك طالب فطور
حسيت انه جته حاله نفسيه بسببنا
بس بعدين اخر السنه اعترفنا له
وجيت انا وتؤمي الوحيد
وقلنا له الحقيقه
تعرفون خفنا انه يجي شي في عقله من كثير التفكير فينا

<بلا هياط انت بعد
..
..
تدرون يوم بطاقه الاحوال نواف هو اللي راح بدالي
صور عني وعنه
ولا من شاف ولا من دري
حتى الدوله لاعبين عليهم
<الله من اللعانه في راسك انت اخوك
وانا مريح ونايم في السرير وهو يكرف في هالشموس
بس حق وواجب انا اخوه الكبير لازم يحترمني
فيه موقف مررررررره خطير مع الحلاق
..
نواف: خلاص عاد يكفي قلت بما فيه الكفايه جاء دوري
نايف: دوري والا نهائي
نواف: ياثقل دمك تكفى .. ترى الفرق بينا اني انا خفيف دم وانا ثقيل
نايف: ثقيل كم وزنه
نواف: ما راح ارد عليك بكمل قصتي
نايف: هو انت اصلا قلتها
نواف: خلاص خلوه يكلم نفسه اوب راد عليه
اقولكم موقفنا مع الحلاق

اول ما صرنا نتعامل مع حلاقين
رحنا عند حلاق وقررنا
نطلع الشيب في راسه بعدين نقول معاك الكاميرا الخفيه
<متأثرين في البرنامج
مره رحنا حلاق
دخل نايف وحلق اوك
وبعد ساعه دخلت انا
الحلاق جالس يناظر
قلت له
نواف: فيه شي غلط
الحلاق: مو انت الشخص اللي حلئتك ابل شوي
(ما اعرف وش جنسيته بس هو يتكلك كذا هع)
نواف: لا اصلا ما جيتك
الحلاق: الا اجيت
نواف: والله ما جيتك يا بن الناس اول مره ادخل عندك

وجلست على الكرسي وقلت امش حلقني بس وراي اشغال
<تكفى بالبزنس

وصرنا نجننه كل اسبوع نجيه ونسوي نفس الحركه

بعد شهرين قررنا نقوله الصدق
يوم قلنا له الصدق
حلقنا بلاش
لو دراين قايلين لك من زمان هع

..
..
وبقولكم موقف مره عندنا عزيمه في اليوم اللي رحت اطلع فيه بطاقه احوال لي ولاخوي
حلفت ما اروح العزيمه الاني تعبان واخلاقي زفت
المهم قال
نايف: خلاص انا بروح بدالك
نواف: غصب مو طيب اصلا .. بعد ما كرفت مثلي
نايف: حتى انا بكرف بسلم على ميه رجال دبل
نواف: وانا رايح اسوي الف شغله دبل
نايف: خلاص خلاص .. ازعجتني بروح بدالك
بس لا تمن علي
نواف: اقول اطلع وسكر الباب
وراك
..
طلع نايف ورحت انا في سابع نومه

..
..
نايف: بكمل اللي صار
رحت العزيمه
وقلت لـ ابوي اني بجي انا ونواف بسيارتنا
..
اول مره اروح هذاك الطريق لحالي
تصدق نواف فقدك وقتها
نواف: الله لا يفرقنا من شر
نايف: امين

المهم اقولكم
وادخل على الضيوف واسلم
يسالوني وين اخوك قلت وراي الحين بيجي
ويجيك السؤال الثاني انت مين نايف والا نوف
ودي ارد اقول وهو فيه فرق اصلا
بس اسكتهم واقول نايف

بعد خمس دقايق طلعت بخفيه
ودخلت على اساس اني نواف واسلم
ونفس الاسئله
تنقال
اوووف بغيت اخرب الموضوع واقول انا نايف
بس قلت يابن الناس تعوذ من ابليس واسكت
وكمل
وعدت العزيمه على خير
على فكره ابوي للحين ما يدري عن الموضوع
هع
..
..

تدرون ان عندنا دفتر نكتب فيه كل شي يصير لنا
اذا كنت زعلان من نواف اكتب له
وبعدين هو يرد علي
وهو بعد اذا زعل مني يكتب
<مسوين رومنسين
بس حركه حلووه جربوها
ان شاء الله بيبقى الدفتر طول العمر
بيننا
نواف: ان شاء الله.. نايف قولهم موقفنا يوم جينا نسجل في الجامعه
نايف: تعبت انت قوله
نواف: قايل لك في عرق زوله
بقوله وامري لله
تخيلو اول ما تخرجنا من ثالث ثانوي بنسبه 95 لي
و96 لنايف
اول مره نختلف في شي
المهم قررنا ندخل قانون
ما ادري وش نحس به وقتها
وزياده على كذا امي وابوي الله يخليهم لنا
امنيه نكون محامين
الحمد الله قبلونا بعد اختبارهم الزفت ما ادري وشلون نجحنا
هع
بس مكتوب ندخل قانون
..
الله اكبر الله اكبر
{اذان المغرب}

نواف: اووووووووووووووم الفله
راح الوقت بسرعه
نايف: ياهي ذكريات بعد
نواف: من جد .. كنا نسوي عمايل
نايف: اللحين على حركتنا
نواف: والله فديتنا
نايف: اصلا مو باقي الا نتزوج اختين تؤم
نواف: لينا وألينا لا تناسهم
نايف: تتذكر نواف وش كنا نسوووووي فيهم
نواف:ههههههههههههههههههههههههههههه ياحلوها ذيك الايام
نايف: تتوقع للحين يحبونا
نواف: تلقاهم نسوك مو يحبونك
نايف: والله التحطيم
الصلاة ياللا بس
..
..
وراحو يصلون المغرب
وجسلو مع امهم وسولف وضحك
ونفض غبار الذكرياات اللي لا منتهى لها
نواف: الا صح .. وش اخبار لينا و ألينا
ام نايف: يووه من زمان عنهم والله
نايف: يمه اخطبيهم لنا انا ونواف
نواف: على كيفك يمكن انا ما ابيهم
نايف: خلاص انا تكلمت انت تسكت
الا اقول؟ للحين يشبهون بعض
ام نايف: مثل ما انتم تشبهون بعض
نواف: تخيل نايف ادخل على لينا واحسبتها زوجتي
وتجيه الضربه على راسه من نايف
نايف: اقول استح على وجهك وش هالكلام
نواف: قلت تخيل مو صدق.. وهو تخيل صارت سالفه اجل لو جد وش يصير
نايف: اشرب من دمك
نواف: وش دعوه
وخذوها سوالف
الى العشاء
بعدين صلو وبعدين راحوا تجمع الشباب الاساسي وهو الاستراحه
دخلوا
وسلام وحركات ولا يستغنون عن الاستهبال
قرروا عشاهم يكون شوي
الان اغلب الشله مو موجوده
مافيه الا خالد ورائد ونايف ونواف
وباقي الشله اللي معزوم واللي مسافر
مشاغل الدنيا مشغلتهم
..
وقت تجهيز العشاء..
نواف: الا قول وين الكاتشب ما اشوفه سيد السفره
خالد(صديقهم): مافيه خلص
نواف: مالكم داعي .. مستحيل اكل من دونه
نايف: احسن لا تاكل تخفف
نواف: لا ما ابي اخفف.. فديتني رشيق.. مخقق البنات بـ / جسمي
رائد(بعد صديقهم) : ايه اشوف البنات عند باب الاستراحه ينتظرون يطلع توم كروز السعوديه
نواف:هههههههههههههههه سخيف ما تضحك
نايف: نواف تراها ذبه قويه عليك
نواف: ما اهتم من كلام العذال
خالد: حتى كلام ما تتعرف تتكلم .. وتبي تخقق البنات.. يازينك ساكت..
نواف: يازيني وانا رايح اشتري كاتشب
رائد: من جد يازينك .. ولا تنسى بارد
نواف: فلووسكم
نايف: نواف! وين ناوي تروح
نواف: اشتري كاتشب وبارد
نايف: اجلس بس.. مو باقي شي على العشاء
نواف: اصبروا بشتري وبجي
نايف: ياللا اجل نروح انا وانت
نواف: اللي يسمعك يقول بروح اشتري مفطح مو كاتشب وبارد
خالد: هههههههههههههههههههه.. من جد .. اقول اهجدوا بس.. ياللا بيخلص العشاء
نواف: ياللا جيتكم
وطلع نواف للسوبر ماركت
وباقي رائد وخالد ونايف
يرتبون الاغراض على بال ما يجي نواف

يرن جوال نايف(تؤمي يتصل)
نايف: هلا
نواف: الا اقول وش تبون بيبسي والا حمضيات
نايف يسال الشباب: وش تبون ببسي والا شي ثاني
رائد : بيبسي
خالد: وانا بيبسي
نايف يرجع لـ نواف: كلنا بيبسي
نواف : ياللا جيت
نايف: حافظك ربي
وسكر منه

.
..
رائد: بتسافرون نايف؟
نايف: ما ادري والله للحين
رائد: وانت يا خالد
خالد: أي ان شاء الله الاسبوع الجاي بروح ان شاء الله
نايف و رائد: تروح وترجع بالسلامه
خالد: الله يسلمكم
نايف: بنفقدك يادوب .. بيصير لك وحشه
خالد: اخجلت تواضعي
نايف: وش عندنا اليوم
خالد: ياخي خلني ذوق لو مره
رائد: تسمع بالذوق انت
نايف: ما تحسون نواف تاخر
رائد: لا عادي وقته
نايف: له ثلث ساعه من اتصل علي وهو في السوبر ماركت
خالد: لا تجلس توسوس واتصل عليه
نايف: وهذا اللي بيصير
يتصل بس محد يرد
نايف : ما يرد
خالد: يمكن صامت
نايف: لا ما يحطه صامت هو اعرفه انا
رائد: تلقاه مقلب من مقالب اخوك
نايف: صح نواف سخيف بس مو هالدرجه توصل فيه السخافه
خالد: يمكن لقى احد وجلس يسولف معه وجواله في السياره
نايف: يمكن
رائد: انا بتصل عليه يمكن يرد
خالد: ما رد على اخوه يرد عليك
نايف: ههههههههههههههههههه من جد ... يعني لو مقلب بيصير علينا كلنا
يتصل ر ائد وبعد ما يرد
مره ومرتين وثلاث
بس محد يرد
نايف: اقول طولها الاخ في الله.. نص ساعه
خالد: ان شاء الله خير
يرجع يتصل نايف بعد نواف ما يرد عليهم

نايف بدت عليه علامات الخوف
نايف: يشوف شغله لو صار مقلب والا يسولف مع احد .. احنا جالسين على نار وهو ماسكها خط سوالف
رائد: ما ندري وش عنده اصبر لين يجي
نايف: ما ادري احس وراه شي اخوي .. مو طبيعي

يتصل جوال نايف (تؤمي)
نايف : اخيرآ اتصل ما بغى
رائد: رد رد عليه
نايف: وش رايك يعني بصوره معه
ويرد نايف
نايف: خيييييييييييييير انت وينك من اليوم يالسخيف انت وحركاتك ما تخليها
صوت غريب: السلام عليكم
تلعثم نايف: وعليكم السلام
صوت غريب: معليش اخوي بس صاحب هالجوال صار له حادث وكان اخر من اتصل عليه انت تعرفهَ!
نايف: اخوي وين وش صار عليه
صوت الغريب: الحمد الله صااحب الجوال مافيه شي
واحنا عند التقاطع اللي عند السوبر ماركت تعرفه!
نايف: ايه ايه اعرفه ياللا جيت
وسكر منه

رائد: ش فيه نواف؟
نايف: ما ادري
خالد: فهمنا السالفه
نايف: اخوي صار له حادث وش افهمكم
واحد يوديني له
يقومون كلهم ويروحون بسياره خالد
عند الحادث والعالم متجمعين كلهم
يقدر يدخل نايف بصعووبه من بينهم عشان يوصل لاخوه اللي كان متمد على الارض
الان الاسعاف بعدها ما جت
نايف وهو ضام تؤمه لصدره
نايف: نواف قوووم لا تخليني لحالي.. نواف قول ان هذا مقلب .. نوووواف لا تروح وتخليني
ونواف كان يفتح عيونه ويغمضها
جاء رائد يبي يقووم نايف الان حالته تكسر الخاطر
رائد :خلاص قووم وانا اخوك.. ان شاء الله ما يصير الا كل خير.. تراك تتعبه كذا
نايف: خلووووني مع اخوي .. نواف اللي يخليك قووم .. وقف على رجولك
..
..
جت الاسعاف وراح معهم نايف
ورائد وخالد وراهم
..
..
في المستشفى
الكل في غرفه الانتظار( ابو نايف – عم نايف – نايف – رائد - خالد)
نواف في غرفه العمليات.. الان صارفيه نزيف داخلي
الثواني دقايق .. الدقايق ساعات .. والساعه يوم

نايف.. جالس في زوايه .. ويبكي مثل الطفل .. ويدعي ان اخوه يقوم بالسلامه
وشريط الذكريات يمر قدامه
( كل ساعه في حياة نايف .. نواف كان معه.. في نومه شربه.. خططه.. سوالفه.. همومه.. امانيته.. مستقبله.. )

بأختصار ما يقدر يعيش من غير نصفه الثاني نواف
..

الكل متوتر .. ويدعي ان هالليله تدعي علي خير.. وبسلام

بعد ساعتين الا ربع تقريبا
طلع الدكتور
وكلهم عنده
الدكتور يطالعهم بعيون حايره
ابو نايف: وش صار في ولدي
نايف: اخوي وينه .. حي والا مممـ....( ما يقدر يكملها)
الدكتور: عظم الله اجركم في نواف.. عطاكم عمره
نايف بصرخه : لااااااااااااااااااااااااااااااااااااااااااااااااا اااااااااااااااااااااااااااااااااااااا
اخوي لاااااااااااااااااااااااااا ما مات
راح يركض يبي يدخل غرفه العمليات لكن رفضوا انه يدخل
وكان يصرخ بأعلى صوته اخوووووووووي حي
هم يكذبون علي
وضم ابوه ويبكي مثل الطفل الصغير اللي فقد امه في طفولته

من قوة الصدمه نايف ما تحمل اللي صار له
وطاح عليهم
..
الصبح الساعه 9
صحى نايف
بتعب ويطالع المكان مستغرب منه
لقى خالد جنبه
خالد: الحمد الله على سلامتك
نايف: اللي صار امس حلم والا حقيقه .. اخوي مات والا وشو
خالد: نايف انت مؤمن وتعرف .. ان لله ما اخذ وله ما اعطى
نايف: بس ليش نواف .. ليش نواف.. ليش ما اخذني انا
خالد: نايف تعوذ من ابليس .. لا تعترض على حكمه ربي
نايف: قلت لكم لا يروح لحاله.. الاني خايف عليه
خالد: ما راح ترد شي لو كنت معه
نايف: على الاقل اموت معه.. ما اتعذب في بعده
.. مين ياكل معي.. من يقوم معي.. من يروح ويجي معي.. من يشاركني همومي .. افراحي غيره.. انا فقدت نوووووووووواف.. يعني فقدت نفسي..
كلكم مو مقدرين اللي انا فيه..
محد حاس فيني
محد حاس فيني
ورجع يبكي مره ثانيه
سكت خالد الانه مهما قال ما راح يخفف الصدمه على نايف
نايف: غسلوه
خالد: لا
نايف: ياللا نروح ابي اغسله
خالد: انت تعبان
نايف وهو يقوم من السرير: مو تعبان ولا شي
ياللا بس

..
..
طلع نايف من المستشفى وراح لـ مغسله الاموات اللي راح يتغسل فيها نواف

دخل عليهم وهم توهم بادين في التغسيل الانهم بيصلون عليه الظهر

اول ما دخل عليهم
ضم نواف وهو يبكي
نايف: نواف ليه رحت وخليتني.. نواف مين يروح معي الكليه.. من اتهاوش معه.. من اللي اشكي له.. نواف احبك .. نواف.. ليتني رحت معك
والا مت بدلك
المغسل: لا تعترض على قضاء الله وقدره
نايف: خلااااااااااااااص اخوي راح
المغسل: انت راح تساعدنا والا راح تبكي .. اخوك ما يبي منك الدعاء
نايف: تكفى خليني اشووفه .. الاني اخر مره راح اشوفه على الطبيعه..
آآآآآآآآهـ ليتك معي لو يوم واحد
وباسه على راسه
وطلع
الانه مو قادر يشوفوهم وهم يغسلوون تؤمه
..
في المسجد..
الكل متأثر .. بوفاة نواف.. الانه مات في عز شبابه
بس اكثرهم نايف.. ياويل قلب نايف من فراق تؤمه
..سنده في الحياة..راح عنه وخلاه لحاله
..
المقبره..
نواف يبكي ويقول: تكفووون أدفنوني معه.. ما ابي اجلس لحالي..
وجلس على التراب
الانه حس رجوله ثقيله..
ما تخيل يووم انه راح يدفن اخوه
في عز شبابهم
ما تخيل انه نواف كان واقع لكن من اليوم صار حلم انه يعيش معه
نواف صار ماضي مستحيل يرجع له
..
..
ايام العزء الثلاثه كان نايف حالة مره حزينه ومكتئب .. كره غرفتهم
كره ملابسه اللي كان يلبسهم وهو نواف
كره كل شي يذكره بنواف
الان يتألم اكثر
واكثر الم له
وجرح في قلبه عمره ما راح يلتئم هالجرح
لما احد يجي يسلم عليه يقوله
(عظم الله اجرك في نواف)

لما احد ينطق اسم نواف
تتغير ملامح وجه
..
اليوم اخر يوم من ايام العزاء
خالد: نايف ياللا نقوم ناكل
نايف: مو مشتهي
خالد: حرام عليك شوف وجهك كيف صاير
اصفر وشاحب
لا تاكل عشاني قوم كل عشان ابوك المسكين
نايف: وربي مالي نفس في شي
خالد: اغصب نفسك
نايف: لو اقدر اغصب نفسي في الاكل
كان غصبت نفسي امووت مع نواف
خالد: نايف
نايف: نايف صار ناقص بدون تؤمه
نواف هو اللي كان مكملني
انا الحين ناقص..
قولي خالد.. من اللي راح اشكي له .. من اللي راح اصارحه باي شي يصير لي
مين اللي يخاف على مصلحتي كثره..
لا تحسبون نواف مثل أي اخو واخوه اللي اصغر منه او اكبر منه.. نواف وانا مثل روحين في جسد
.. اتحدا اذا فيه أي اخوين مثلي انا نواف..
تكفووون لا تلوموني .. على اللي اسويه في نفسي
.. عمي امس يقولي .. ليه تنوم في المجلس.. والله غصب .. غصب
احس الغرفه من دون حس نواف.. كئيبه .. ممله
.. ما قدرت ادخلها حاولت .. وربي حاولت بس ما قدرت
..ملابسي اللي كنت البسها انا ونواف.. الحين ما البسها .. كلها ملابس جديده شراها عمي فهد لي..
.. كل ركن في البيت احس انه ينادي نواف بصوت مهموس الا انا اللي انادي نواف بصوت عالي
..
غرفتنا.. الصاله.. المطبخ.. الخيمه.. عطره.. اوراقه.. محفظته.. جواله.. كتبه..
تصدق حتى اشاره اللي عند بيتنا.. له ذكريات خاصه معه..
يعني كل شبر اروح .. يروح معي نواف

يالله ما اتخيل انوم في السرير من دون ما اشوف نواف نايم قدامي..
مين اللي راح يقولي
لا تنسى اذكار النوم
من اللي راح يقولي تصبح على خير
ما تخليت في يوم اني راح ادق على جواله ويصير مقفل
.. ما تخيلت يووم اكتب ..اصور.. ذكرى هو مو موجود فيها..
ما تخليت يوووم انا كلي اعيش من دوونه
..
صعععععععععععععععععب والله يا خالد صعب..
نواف هو امي وابوي و اخوي وصديقي
هو حبيبي هو املي كان..
دفنت نواف.. ودفنت املي معه
تدري
في يوم وفاته كنا نشوف شريط لنا.. وذكريات لنا.. كنا نضحك.. ونستهبل على اللي نسويه مع الناس
واليوم..
كل شي لي لحالي
احس اني اناني
الاني راح امتلك هاذي الاشياء لحالي
..
كان املنا نتزوج اختين تؤم
ولكن اليوم مستحيل
عشان كذا اقولك دفنت الامل
آآآآآآآآآآآآآآآآآآآآآآآآآآآآآهـ
خالد: انت تعرف ان امك .. ابوك .. الحين حاطين املهم فيك بعد الله سبحانه
لا تخذلهم.. ولا تعيش كئيب... اللي راح راح
مستحيل يرجع
نايف: مهما قلت ومهما عبرت.. ما راح يوصلك ذره من الالم اللي احس فيه..
..
..
..

بعد شهر من وفاة نواف
البيت كئيب.. لا صوت ولا حس
نايف صارت طلعاته قليله .. تنعد على الاصابع
صار اسير المجلس..
واغلب جلساته مع امه وابوه
ولو غصبوه اخوياه يطلع
يطلع مجامله.. ولخاطرهم..
بس الجلسه ممله.. عكس اول..
حتى ضحكه صارت مجامله
..
في يوم الثلاثاء
بعد المغرب
جالس مع امه وابوه
نايف: يبه انا قررت اكمل دراستي برا
ابو نايف: وهنا وش فيها دراستك
نايف: ما اقدر اروح الجامعه
ابو نايف: ليه؟ عسى ماشر
نايف: صرت اكرها ما اقدر ادخلها من دون نواف

ام نايف ( والعبره خانقتها): تروح وتخليني
يكفي اني فقدت اخوك.. تكمل انت وتروح.. مين يبقى لي..
نايف: يمه .. تكفين حسي فيني
ام نايف: وانا من يحس فيني.. ليه الاني ساكته .. ومحتسبه الاجر.. تحسب اني ما فقدته..
فقدت نواف.. وتبي افقدك انت..
وحتى انت معاد صرت مثل اول .. تغيرت كثير
نايف( وهو يحاول يتجاهل كلام امه): هاه وش قلتوا على دراستي
ابو نايف: واحنا من يصير عندنا
ام نايف: انا مو موافقه.. مافيني افقدكم كلكم
نايف: يمه.. يبه.. اذا تبون سعادتي ومستقبلي.. خلوني اروح تكفوون.. خلوني اروح
.
.
لحظه صمت
ابو نايف: مايصير الاخير
..
..
..
بعد اسبوعين .. ونايف.. لا زال مصر انا يسافر برا...
اخيرآ
قدر يقنع امه .. الانها هي اللي كانت رافضه الفكره من الاساس
عكس ابوه .. صح رافض الفكره.. بس مو مثل امه
اللي يتقطع نايف لما يشوفها تبكي لما يجي طاري سفره..

ام نايف: ما تسافر الا بشرطي
نايف: امري.. تدللي
ام نايف: ما تروح الا وزجتك معك
نايف: يمه من تبيني وانا صغير وتوني طالب
ام نايف: لينا
نايف: اخت ألينا؟
ام نايف: ايه
نايف: لا معليش بنت ما افكر فيها
ام نايف: ليه
نايف: اذا خلصوا بنات الخليج كلهم فكرت فيها
ام نايف: اجل ما في الا بنت عمتك مشاعل "وجدان"
نايف: وجدان بنت عمتي مشاعل
ونعم
.. بس تتوقعين يوافقون علي
ام نايف: الف من يتمناك
نايف: خلاص كلميهم.. وبشرط.. ترى ما ابي زواج ولا شي.. في بيتهم وانتهى الموضوع
ام نايف: ما يصير الا تبيه ان شاء الله
..
..
..
بعد
اسبوعين تمت مراسم الخطبه والشوفه الشرعيه
..
واليوم الملكه
نايف على وجدان
الكل يبارك له..
وفرحان له..
الان محد كان متوقع انه يتزوج..
واصلا هو تزوج غصب مو بكيفه.. بس عشان يرضي امه.. عشان توافق انه يسافر
..
بعد شهر كان زواجهم
ومثل قال نايف.. ما يبي زواج كبير
مختصر في بيت اهل العروس
..نايف ما تمنى احد معه في هاليوم الا اخوه نواف..
بس تمنى نواف..
تخيل انه وهو نواف واقفين جنب بعض
زواجهم في يوم واحد .. زوجاتهم تؤم
.. بس كل شي تغير في يوم ليله.. تغير كل تخطيطهم للمستقبل
..
..
بعد الزواج بيومين سافر لـ استراليا..
منها شهر عسل ودراسه في نفس الوقت..
شبه ارتاح نفسيآ .. هناك
الان كل شي جديد عليه..
ما يذكره بـ نواف.. او يتخيل انه واقف هنا او هناك
..
حملت زوجته وجدان بعد 5 شهور من زواجهم
..
وكانوا الكل بدون استثناء فرحانين بالنونو اللي راح يجي في الطريق..
الان اذا صار ولد راح يسميه نواف
على اسم تؤمه..

..
..


بعد تعب 9 شهور
ولدت وجدان..
وجابت الولد الاول لهم..
وسماه نواف ..
نواف بالنسبه لابوه.. اغلى من كل شي في دنيا..
كانوا مدلعينه حيل
كل شي يبيه مجاب له..
كبر نواف
وكل ما يكبر يوم.. يزيد غلاه وحبه اكثر واكثر
كان دووم نايف.. يسمي ولده تؤمي..
ونواف يسمي ابوه
تؤمي.. ما كان يعرف معنى هالكلمه بس اذا كبر اكيد راح يعرف معناها
ومقصد ابوه من هالكلمه

..
..
نايف: الله يخليه لنا.. مسوي لنا جو
وجدان: جو لك انت .. اما انا متعبني
نايف: وش فايدتك اجل ام .. على الفاضي
وجدان: انت وش فايدتك ابو على الفاضي
نايف: لا بس انا العب معه
وجدان: وانا اكرف.. واتعب واصارخ.. ولا حياة لمن تنادي .. اصلا ماخلاه كذا
الا دلعك له عمره سنتين تقول عمره 4 ماشاء الله
نايف: ولدي لا تنظلينه .. بعدين كم عندي من نواف
وجدان: مع انه متعبني بس احيانآ احبه اكثر منك
نايف: ولا قدامي بعد
وجدان:ههههههههههههههه ..دايم اسمع امي تقولها لابوي اذا عصبت منه
وحبيت اغتنم الفرصه واقولها
نايف: وما جت الا علي
وجدان: فديتك ما في غيرك اموون عليه
..
..
كل اسبوع لازم نايف يودي نواف للملاهي
مره من المرات

كان يلعب نواف في لعبه ونايف ينتظر تؤمه
شاف محل العاب
وراح يشتري لعبه لـ نواف على بال ما تخلص اللعبه

شرا ورجع للعبه للي فيها نواف

لقى كل الاطفال اللي فيها نازلين

ونواف ماله اثر

سأل صاحب اللعبه عن طفل صغير
قال ما ادري
عصب نايف وجلس يدور نواف في كل مكان مثل المجنون
تشتت نظره ما بين الاطفال كلهم
يدور يمين يسار

اي احد قدامه يسأل عن ولده ويوصفه لهم
بس كلهم ما يعرفونه
الان ملاهي كبيره

نايف اعصابه شبهه انهارت
بعد ثلاث ساعات من البحث
ووجدان ما تدري عن شي ما حب انه يقلقها

لقاه مع رجل امن ويأكل ايس كريم

نايف هنا يفرح الانه لقى ولده سالم
والا يحزن الانه يدوره واخر شي مستانس الولد وما درا عن شي

اول ما شاف نواف ابوه
قال بابا
راح نايف يضمه
حييييييل

الان الضنى غالي
مهما كان..
..

..
..
مرت اربع سنوات وهو في استراليا من دون ما يرجعون لسعوديه ..
والولد صار عمره تقريبآ ثلاث سنوات
جاء اليوم الموعود
موعد رجعتهم للسعوديه والى الابد
بعد ما خلص نايف دراسته..
..
الكل كان منتظر هاللحظه..
الانهم اشتاقوا له ولزوجته ولـ نواف الصغير اللي ما عمرهم شافوه الا بالصور
..
تغير نايف.. وتغيرت شخصيته.. عن اول.. ما توفى اخوه..
يمكن الغربه لها دور
ونواف الصغير له الدور الاكبر اكيد.. في حياة ابوه

في المطار
كان في استقباله.. عمه فهد وخالد ورائد وابوه
اول ما شافهم نزلت دمعه من عيونه
تمنى نواف بينهم

حاول يخفي ملامح الماضي الانه صار نايف جديد
نايف وحيد من دون تؤمه
نايف قدر يعيش حياته من جديد
وبشكل جديد
غير الماضي
عرف ان مو نهايه العالم لما تفقد شخص
نهايه العالم لما تتذكر الماضي المؤلم
وتعيش على ذكرياته
وتدفن الامل والتفاؤل معه

..
عرف ان الحياة مستمره
ما راح تتوقف عند موت شخص معين في حياته





..


..


..
..
..
النهـــــــــــــــــــــــايه
بقلم
الدره النادره

وخلصنا القصه
<احلفي

اتمنى انها عجبتكم
القاكم في مواضيع اخرى
<متأثره ما عليها شرهه

حراااااااااااااااااام عليييك ليش كذا

::

وهـ بس

وقسم انواع الصيااح ,,
قصه تجنن ,,

انتي اللي كاتبتها ؟!
ماشاء الله عليك ,,

اسلوبك حلو ,
بس مرره حزيينه

::

تسلميين

اهئ اهئ اهئ اهئ

قطعتي قلبي ومات نواف
ااااااااه ااااااااااه اااااااااااه
والله انك بكيتيني

قصه حلوه وروعه من مبدعه زيك

تصدقي اني اكتب قصص
بس ماطرالي انزلها النت
او اكتبها وورد
فيني عرق زوله
ههههه

فديت القصه وكاتبة القصه
ابدعت
بس ياريت مره ثانيه ماتكون حزينه
زي كذا
انا عني لحد الان ماتجرأت اكتب قصص حزينه
كل نهايات سعيده ولله الحمد

يصلمووووووو
انتظر بفارغ الصبر جديدك من القصص

تصدقي توني انتبه للموضوع
بس احس الموضوع
هو حلو
بس احس فيه احلى منه كمان
ابدعت