اقلقني الطار مدري الطرق ولا حس راعيه

السلام عليكم
اخباركم ؟

شمسوين بالدنيا؟ انشاء الله تزقحون

يعني بعد غيبه دامت فتره من الزمن بسبب نزاع عائلي وبسبب تدهور الصحه عند بعض العضوات فيذا وبسبب اني انا كنت رايحه بعثه<<قامت تكذب كل شي ولا البعثه

المهم اني رجعت وهذا اهم شي

طيب يعني هذا اول موضوع لي بعد الغيبه وحبيته يكون غير شوي
يعني يكون جامع كل ابو شي بالحياة







}{مــدخــل}{

لا تسألوني ليه انا
عاشق خزامى مستهام

اذا عـــرفتوني انــا
تــدرون وش ســر الـغرام

أصــلي انـــا بـــيتي شـــعر
والبــر هـو ديــرة هلي









يازين البر ويازين البدو ويازيني




هذي الصوره قبل يومين وريتها ولد اختي عمره 3 سنوات المهم وريته الصوره وقوله شف الشاطر يساعد ماما يغسل المواعين
هو ماكذب خبر فصخ ثيابه وراح للمطبخ يقول بساعد ماما




شكله مو مصدق انه ولد كل شوي يشوف <<ياحظك





يازين الي يقلدون ابو العز

ماتلاحظون معي ان البزران يحبون شخصيات باب الحاره ويتابعونها اكثر من الكبار؟؟
يعني كانت ايام رمضان يتجهزون قبال التلفزيون قبل ماتجي




ياشين اللقافه ياخي خلوو الشايب يتهوااا




















}{فااااصل}{
اقلقني الطار مدري الطرق ولا حس راعيه
في تالي الليل لج الصوت واحرمني منامي

يا شابك الطار بالسبروج عيد القاف واثنيه
حتى يظل المليح الحالي الزين ما يشره عليا










ايييييييييييه الله على الطيران <<الأخت دوسريه

المهم هذي سالفتي يوووم زواج بنت عمتي يلعنه من عرس تفشلت حتى قلت امين


نبدأ من بيتنا ويوم اتكشخ اقالي

طبعآ تسبحت <<احلفي

وخلصت وطلعت وسشورت شعري وطبعآ السنعه اللي هي انا اعرف اسوي تسريحات ومكياجي يخقق وتزيين الحواجب مبدعه فيه <<ماتلاحظون انه مابقي إلا اقول للحجز اتصلووو على الرقم .......

المهم زينت الشعر والمكياج ولبست الفستان وكان يسحب بقووه وكلهم يحاول يقنعني اني اقصره شوي قبل الزواج وانا معيه اقول افخم اذا طلع طوييييييييل المهم هوو كان اسود وفيه رسمة طااااوووووس<<لايفوتكم الطاااوووس يوم لبست الفستان حسيت اني شايفه نفسي مدري ليه يمكن الطااوووس له دخل

المهم نرجع لصلب الموووضوووع

رحنا للزواج وسلمت على اللي واقفين عند المدخل وسحبت على ام الباقين ماتذكرت اني ماسلمت على جدتي إلا يوم رجعت للبيت بس هي الغلطانه ليش ماوقفت عند الباب>>احد يعطيني كف

المهم اني يوم خلصت من التسليم شلت بقشتي <<(البقشه كانت تحتوي على مكياج+بنس+خيط+ابره+مشط+سبريه+لفافات +جزمات لحالة الطوارئ)
ايه شلت بقشتي ويوم جلست حطيتها تحت الطاوله وامي متفشله مني بس انا ماهمني احد اهم شي راحتي النفسيه ان عفشي معي<<قايله اني اشك اني نظام كوفيرات

المهم اني قبل لاأطلع من البيت حالفه اني مارقص<<ودي اسوي ثقل

بس بالقاعه ششت وقمت ارقص وكنت ارقص بالجزم وجزم الزواجات كعب المهم وانا ارقص حسيت اني بطيح

عاد قلت بنفسي يمكن من الجزم يوم جت اغنيه احبها قلت بقوم ارقص بس بدون جزم وقمت ارقص وانا حفيانه بس حتى وانا شايله الجزم بغيت اطيح وانا افكر وين المشكله واوقف رقص واروح لأختي واقولها اين تكمن المشكله قالت من فستانك الطويل

ماقتنعت بكلامه يوم رحت ارقص مره عاشره



وززز طععععععع دببببببب<<تراي زلقت وطحت

والحريم تجمعو علي ويقولون بسم الله عليك ماتشوفين شر وانا اللي راح وجهي كوووووكتييييييييييل
وانزل وانا بي صيااااح واحس وجهي طااااح ومو بمكانه

واقعد بالكرسي وانا خلاص الدمعه عند الباب قالت لي امي روحي للحمامات ترا شعرك انحاس وسااااح وانا اللي اندعس تحت الطاوله واطلع البقشه وانط واروح للحمام ازبط شعري وارجع وادخل البقشه تحت الطاوله

المهم جت عمتي وحلفت اني اقوم ارقص وانا لا لا لا لا لا لا لا وهي تقول تراي حلفت وتراك منتب اول ولا اخر وحده تطيح <<حسيت اني مطلقه على اول ولا اخر المهم قمت برقص عشانه حلفت بس لا افوووتكم

فصخت الجزم ورفعت الفستان وحطيته تحت ابطي وتطلع سيقاني وكنت شايله بموووووووس وانواع التزلط برجليني وانووواااااااع اللزقات<<لايفوتكم الشكل وصرت ارقص رقص ياااالللله لك الحمد كني تكرونيه بمكه وهاجه من البلديه

بس قسم القسمات انه طلعت رقصه غريبه حتى الحريم يصفرون ويصفقون<<شكلهم يشجعوني لأني طايحه قبل

وعقب اللي صارلي بالعرس حلفت اني مافصل ولا اشتري فستان طويل

وكانت النتيجه اني شريت فستان كل من شافه ضحك وقال كنه قميص نوم وانا اقول مو مهم اهم شي ماطيح << يارب تنفك العقده بسرعه لأني حومت كبد نفسي

اللي ناخذه من القصه >>

1\ياويل وحده تلبس فستان طويلDD

2\لزوووم اللزايم تاخذون معكم للعرس بقشه

3\لاتشيلن بموس عشان ماتتزلط الرجلين+الأيدين

4\واخيرآ اتصلوااا علي للحجز بس تراي ماسوي خصومات حتى لو كانت اختي<<عطوني كف تكفوووون






ومادامنا بالعروس والطيران وذي الحركات بقولكم وش صار لي يوم الخميس اللي راح


كان زواج ولد عمتي<<احلفي

ايه انا مثل ماتعرفون اني تعقدت من الفستان الطويل عاد صرت مالبس إلا قصير ويوم الخميس لبست فستان اقرب للقميص من الفستان

وانا ارقص رقص باااارد وكنت لحالي واحس اني كنت اله تتحرك <<شكله ماتعرف ترقص

وانا ارقص بنت عمتي جت ترقص معي اقاله تشجعني وياليتها ماجت اول مارقت للمنصه كلمتني وانا ماسمعت وش تقول

عااااد وش سويت انا التنحه وقفت رقص وقلت هاااااااااااه؟؟؟؟


هي قامت تضحك وانا مازلت اقول هااااااااااااااه!!!!


عاد هي تفشلت مني وقالت طيب وراك وقفتي!!!

عاد استوعبت ورجعت ارقص بس وهو وجهي طايح من الفشيله


ايه وامي قعدت تعلق علي لين اليوم وهي تعلق تقووووول وانتي ترقصين كنك بزر توه يخطي

<<الله من زين الأم




ايه وشسمه وبس خلصنا


والخلاصه ياويل وحده تحاول ترقص <<تلايطي بس











}{قرار ماينفع لي }{
امس قررت اغير مسار حياتي وقررت اطلع وحده ثانيه

رحت للمكتبه عشان اشتري كتب مدري وشوله بس يوم قررت اتغير قلت بشتري كتب

رحت وشريت ثلاث كتب

1 كتاب قوة عقلك الباطن

2 كتاب المؤثر (قوة تغيير اي شي)

3 التوجه الذهني الإيجابي



انا شريتهم ورجعت البيت اتكلم بالفصحى <<لحد يسألني ليه لأني حسيت لازم اتكلم كذا مع التغيير
بس العجز والزواله معششه براسي قريت 10 صفحات ونص الصفحه 11 من كتاب قوة عقلك الباطن وعقبها قفلت الكتاب وجدعته تحت السرير <<يعني مافيه امل افتحه مره ثانيه

وبعدها قررت اني مافكر اني احاول اتغير








}{صور هباااااال }{





احيانآ نحنووو معشر البنات تجينا حالات هبال حالات جنون حالات مصاله لأبعد حد<<ركزوا على المصاله

انا اتوقع انووو بعد الصوره هذي الأهالي بتمنع على بناتها انهم يشربون هلستون






اول شي اشكر اخوي بدر الشوق على الصوره التحفه وانا اقول انوو لطشتها منه
والسبب ليش لطشته لأنها اعجبتني <احلفي
وعشان اقولكم ترا المدخن عمره قصير <لايكثر ياأنا











}{تحشيش مع صديقتي}{


قبل يومين كنت انا وصديقتي على المسن وماسكين خط بالغباء والتحشيش المهم اننا على اي تفاهه نضحك عاد هي قعدت تألف قصه وتخربط وانا تحمست معها وعشت الجو
بس للأسف ماكلملت القصه على المسن عشانها بتنام لأنو عندهم سفره بس وعدتني انها ترسل القصه كامله على الجوال

وارسلتها الحلوه وقلت لها بنزلها بالمنتدى و وافقت بس اشترطت اني اكتب حقوق الكتابه عاد انا قلت لكم كل ابو ذي المقدمه عشانها اشترطت حقوق الكتابه




ويلله اخليكم مع خيالها >>>

كان يامكان في حاضر هذا الزمان وسالف الظهر والأوان >>ليش قلت الظهر لأني كتبتها الظهر
هي قصه واقعيه مازلت اعيش احداثها>>ياكرهي للأسلوب هذا

قصة حدثت لفتاة في عمر الزهور>>ليش دايم زهور مايصير ورد>>برآآآآآآآآآ

كان فيه شله مكونه من 5 بنات عسل وبصل >>لازم تحوس المدح
سوسو وريري وميشو ونوني ...<<لحد يروح باله لنوني حقتكم تراه نوني غيييييير شكل
طبعآ الي اسمها سوسو امنية حياتها تصير ولد بأي طريقه لو اي شي تسويه وتخاطر بحياتها تصير ولد عادي عندها
طبعآ باقي الشله كان ودهم لو يكونون يوم اولاد بس مو مثل هوس سوسو وجنونها

طبعآ جاء يوم من الايام اجتمعوا الشله في بيت ريري كانت سوسو مش ولابد معهم بعالم ثاني والبنات ضحك ووناسه وكل وحده تقول وش بتسوي بالعطله من طلعات وسفر من هذا القبيل>>حسيت اني دكتوره
وفجأه تكلمت سوسو قالت بنات لو صرت ولد أحد يرضى يتزوجني منكم؟
عم السكون المجلس
سوسو تقول هاه ليش ساكتين ترضون ولا لا؟
ميشو قالت طبعآ لا مستحيل اخذك
نوني جلست تبكي لأنها رخمه ماتتحمل صديقتها تصير ولد ولاتتزوجها <<طبيعي تكون رخمه لأنها نوني
مومي قالت ماعندي مانع حاليآ بس لاجاء الصدق يمكن لا
ريري ساكته ماردت لاهي قالت لا ولا هي قالت ايه مصدومه من الكلام الي قالته سوسو

جات العطله وكلن سافر ونسى موضوع سوسو عبالهم بس كلام ومزح

سافرت سوسو او بالاخص راحت تسوي عمليه تغير جنسها من أنثى لذكر سووت العمليه ونجحت وغيرت اسمها الى بسام >>لاتسألون كيف صارت التفاصيل المخرج عاوز كده والعهده على الراوي

المهم خلصت العطله وكلن رجع لبيته وبدوا يتصلون على بعض الشله عشان يجتمعون ويتسامرون كالعاده ويتصلون على سوسو ماترد راحو لبيتها ماترد
استغربوا غريبه مو عادتها واتصلوا مره ثانيه ورد عليهم صوت ولد على جوالها
طبعآ اللي داقه ميشو هي دايم تحب تسوي كونان <<بيجيني كف

المهم قالت الو سوسو
قال لا معاك بسام ؟ ؟
هي سكتت ماتدري وش تقول وهي من النوع الي يخاف
قالت لا هذا جوال سوسو
قال لها لا هذا جوال بسام ! !
طبعآ بسام الي هو سايقآ سوسو وده يقول انه سوسو بس مو قادر يقول اكيد بينصدمون لو بيقول لهم
سكرت ميشو
دقت بعدها نوني تبي تتأكد يوم رد بسام
قال نعم !!!
قالت هذا جوال سوسو
هنا اعترف بسام وقال
ايه انا سوسو بس قلبت وصرت ولد
عاد هنا صارخت نوني مستحيل شلون
وعلمها السالفه كذا وكذا ........إلخ<<يعجبني هذا الأختصار اذا لقيته بالكتاب استانس عشان ماأكمل المذاكره>>لاحول الله كملي

تخلوا طبعآ الشله عن سوسو شلون سوت كذا مو مصدقين >>رحمت سوسو ياقليبي هي وحيده صارت
الشله يوم تركوا سوسو ماشافوا وشلون صار شكلها بعد التغير
مرت الأيام والسنين وكلن درس وكمل وتوظف وراح بطريقه من الشله
بسام مانسي الشله كان يقتص اخبارهم بطريقته الخاصه>>طالعه من الأرشيف يقتص متعوب عليها

ميشو تزوجة ونوني تمكلت ومومي انخطبت بس لحد الحين ماوافقت>>وش يدريك انتي
ريري ماجاها نصيبها ماكتب ربي
بسام جته فكره انه يخطب ريري لان ماقد شافته ابد بعد التغيير
اتصل على ابو ريري
وقال انه بسام ال.....
وانه جاي يخطب ....إلخ
راح يخطب طبعآ بسام موظف له صيت مرموق>>يمديكم على الكلام
ماعليه جنتل مان ذوق وجمال وكشخه وراتب سنع وكل ابو شي فيه حلو ..
جاء يوم من الايام طق الباب >>ليش مو الجرس
طلع ابو ريري طبعآ بسام يتنافض أول مره يروح بيت ريري بعد ماصار ولد يتذكر كيف يدخل اول مع الشله وصراخ
والحين يدخل بهدوء وثقل ورزانه
وقال الابو حياك بسام وبدأ يسأله شلون عرفتنا ومن هالكلام...إلخ
طبعآ ريري مرة بالصدفه من عند المجلس وقزت بسام من بعيد وخقت عليه مررره بس مادققت بالملامح بس عجبها الرزه وجلسته >>وهذا قز بس انعن عدوك كملي
طبعآ الابو قال بسأل ريري >>وين الابو هذا الي يدلع بنته مايقول اسمها >>العهده على الراوي
وارد لك خبر هذا زواج مو لعب
قال بسام هذا اكيد من حق البنت
قال الابو عن اذنك بسألها وارجع لك>>الابو مستعجل يبي يفتك من البنت بأي طريقه
راح الابو لم غرفة ريري
تك تك تك >>>صوت نعال الابو

وطق طق >>>صوت طق الباب
<<احد قالك انك ثقيلة دم اخلصي علينا

طبعآ ريري جالسه او بلأخص منبطحه على السرير وساهيه وتلعب بخصلات شعرها وتفكر بالي شافته وخاقه عليه>>هذا شعور اي فتاة عندما تصاب بحالة(الخوقاق)

>>الابو احترق عند الباب نسيت دوره
طق الباب ودخل قال ريري
قالت سم وتعدلت بجلستها
قال فيه واحد اسمه بسام انه جاي وانه خاطبك وكذا وكذا .......
هي حمرن خديداتها واستحت وقالت مدري باباتي>>حسيتها خكريه
الشور شورك والي تشوفه انت صح سوه
طلع الابو من الغرفه ولا ريري تضحك ومستانسه >>وين الحياء الي قبل شوي
نزل الابو ولا بسام جالس على اعصابه يما جلس يما وقف مسكين حالته حاله
دخل البو المجلس ولابسام يبي يموت يبي يعرف وش قالت ريري موافقه ولا لا
قال الابو اسمع ياوليدي يابسام البنت موافقه
من يوم قال موافقه ولا بسام يقوم ويمطخ ويبوس الابو
الابو هنا شك مافيه رجال يسوي كذا وترا بسام (سوسو) سابقآ ماترك هالعاده الي هي التمطيخ والتبويس
استوعب بسام اللي سواه وجلس يصرف انه من الفرحه سوا كذا
حددوا الموعد ومتى يشوفها قال الابو بعد اسبوع
جاء اليوم المنتظر يوم الشوفه
بسام على اعصابه وريري على اعصابها
جاء بسام لم البيت ودخله الابو >>أجل بيخليه عند الباب
قال تفضل وكرمه وأحشمه ورضعه >>وش تحسين فيه
وقال الابو الحين انادي ريري تشوفها
راح ونادى ريري وجت ريري تمشي بكل حياء وادب دخلها الابو على بسام وجلست ريري على الكنبه الي قبال بسام
رفعت عيونها وتطالع فيه

هو رفع عيونه وطالع فيها
هي شهقت شهقه سمعها من على فوق الأرض وتحت السماء>>تعبير خطير حشى لو انها جني يوم تشهق هالشهقه




قالت ريري وهي تطالع بسام

سوسو سوسو لا شلون كذا صرتي ولد ابي اصير مثلك
>>هذا همها شلون صارت ولد مو العرس

وياويلي على بسام لاهو اعرس ولاهو تهنى يوم صار ولد




تدرون ليش؟؟




لأنه


ط

ل

ع

ت

تحلم







وتوته توته خلصت الحتوته
الحقوق محفوظه للكاتبه يام الشوق


وتسلمين يام الشوق على القصه

بس لاتتعودين لها













}{مـخــرج}{
الله على شمس المغيب
والليل الى نسنس هواه

الضّــو تــــقدح بـــالـــجمر
والنجم يقدح في سمــاه













وفي نهاية موضوعي اعتذر على الأطاله واتمنى اني قدرت ارسم البسمه على شفاهكم وانشاء الله ماندمتوا على دخولكم
سبحانك اللهم وبحمدك اشهد الا اله إلا انت استغفرك واتوب إليك

كانت معكم : بلقيس

تقبلو تحياتي ودعواتي لكم . . .

بلقيس اوووقسسسسسسسسم انتس ابطللل شي بالعآلم


قصصتس خورآآفيه وكلش


الله يقطعتس والله اني مآسكه بطني من الضحكـ


أمسكي

اولا من طول الغيبات جاب الغنايم

اما يازينك اطلعي من مخي يا....؟

اقتباس:

هذي الصوره قبل يومين وريتها ولد اختي عمره 3 سنوات المهم وريته الصوره وقوله شف الشاطر يساعد ماما يغسل المواعين هو ماكذب خبر فصخ ثيابه وراح للمطبخ يقول بساعد ماما

حتى انا سويتها ما صدقت على الله اتفصخ

اقتباس:

شكله مو مصدق انه ولد كل شوي يشوف <<ياحظك

ههههههههههههههههههه
يا حظه على ايش

اقتباس:

ياشين اللقافه ياخي خلوو الشايب يتهوااا

ههههههههههههههههههههههههههههه

ذكروني بعيال عمي << بغى يكعها



لي باك مع باقي الموضوع

الموضوع مثبت بدبوس



ولي باك مع القصص الغبيه

هههههههههههههههههههههههههههههههههههههههههههههههههه ههههههههههههههههه<<<جالس وفااااطس ضحك

ايه وربي صدقت يالخااال من طول الغيباااات جاااب الغناااايم وان اشهد انها جااابت ولد<<<مادري احس انها مدحه

بس موضوع منوع وبطل وخوراااافي وجونااااان
الصووور موب صاااحيه بس ولد اختك هذا مو صاااحي بس شكله هب رييييح

وربي لو بعلق على كل شي بالموضوع بطوووول بس يكفي قصة هالخبوووول واللي تبي تصير ولد موب صاااحيه اجل بساااام هاااه

تسلمين بلقيس وان شاء الله ماتغيبين مره ثااانيه عشااان تجين كل يوم فيذااا وتنزلين موضوع بعد عرس عيااال عماااتك<<<ليه كل زواجاتكم عيااال عماااتك؟؟؟

ولا عاااد يطري على بالك ترقصين يكفي فضااايح
يالله ننتظر جديدك بس بدووون رقص

رهيبه اعجبوني

عأأأدي وسعي صدرك كلنا كذا ولين سمعنا الطق ابد تقولين فينا شي

اقتباس:

عاد قلت بنفسي يمكن من الجزم يوم جت اغنيه احبها قلت بقوم ارقص بس بدون جزم وقمت ارقص وانا حفيانه

تقولينه صادقه؟؟؟

فشلتينااا احد يرقص حفيآآآن كان كملتيها وقمتي تناقزين رايحه جايه

اقتباس:

وززز طععععععع دببببببب<<تراي زلقت وطحت

بسم الله عليتس ماتنلامين يخرب يخرب البرستيج لين طاح الواحد

اقتباس:

3\لاتشيلن بموس عشان ماتتزلط الرجلين+الأيدين

مجنونه انتي تشيلين بموس ياخني كان انتي عجازه اشتري لك آآلة براون والا جيبي لك فلبينيه تشيل لك

اقتباس:

عااااد وش سويت انا التنحه وقفت رقص وقلت هاااااااااااه؟؟؟؟ هي قامت تضحك وانا مازلت اقول هااااااااااااااه!!!!

عآآآآآآدي وسعي صدرك انا اسولف وانا ارقص <<نصابه عاد ماينسمع شي






خلاص عاااد عطيتس وجه ورديت على شوي من الموضوع والباقي بخليه بكراا


امسكي

الخال

<<ماعندي شي اقوله قلت احط هذا

اقتباس:

اما يازينك اطلعي من مخي يا....؟

يا...... طيب كمل عشان استوعب

اقتباس:

حتى انا سويتها ما صدقت على الله اتفصخ

غاسله يدي منك من زمان

اقتباس:

يا حظه على ايش

على هذاك الشي

اقتباس:

ذكروني بعيال عمي << بغى يكعها

شيسووووون عيال عمك قلي ماعلم احد

اقتباس:

لي باك مع باقي الموضوع

مارجعت للحين

دمار

شووووكررررررااااااان

اقتباس:

ولي باك مع القصص الغبيه

طيب يالي قصصك ذكيه

انتظر باكك

بوح

اذا خلصت ضحك عطني خبر <<وش احس فيه

اقتباس:

اشهد انها جااابت ولد<<<مادري احس انها مدحه

اقتباس:

الصووور موب صاااحيه بس ولد اختك هذا مو صاااحي بس شكله هب رييييح

امووووماااااااا تعال شفه انواع السباكه


[quote] وربي لو بعلق على كل شي بالموضوع بطوووول [QUOTE]

تكفيني كلمه وحده بس

اقتباس:

بس يكفي قصة هالخبوووول واللي تبي تصير ولد موب صاااحيه اجل بساااام هاااه

اي والله مو صاحيه الحمد لله والشكر

اقتباس:

ليه كل زواجاتكم عيااال عماااتك؟؟؟

بلا من كثرهم
ماشاء الله<<تذكرت ناس احبهم

اقتباس:

ولا عاااد يطري على بالك ترقصين يكفي فضااايح يالله ننتظر جديدك بس بدووون رقص

انشاء الله