اللحوم السعوديات انواع الكشخه D=

,’





السلام عليكم ،،




يقولون ان السعوديين خاصة والخليجيين عامه يسنترون في باريس وجنيف كل صيفيه.. يعني يا يروحون لـ باريس اول بعدين جنيف والا جنيف أول بعدين باريس وهذا الغالب جايكم بالسبب لا تستعجلون ..


فـ يا حضرات المشاهدين انا اسمع الناس ازعجوننا (يعني العيال اللي حولي) انا رحت باريس وانا رحت جنيف .. وشفت خويي في جنيف وشفت خويتي في باريس .. وهكذا!!


قلت يا فيصل علشان تقطع الشك باليقين لازم تروح للمدينتين هذولا علشان تشوفهم وش هم من لحيه وليش السعوديين مزعجيننا فيها !!


وصار هالشي الحمدلله ان فيصل طال عمره اقتنع انه يروح للمدينتين هذولا علشان يكشف سر السعوديين



طبعاً قبل لا اروح.. استفسرت عن الجو هناك وكلمت واحد قالي ترا ان ماجبت الجاكيت حقك بتخرب سفرتك وبتجيك انفلونزا من البرررد اللي هناااك .. قلت اوكيشن يا صديقي





المهم الله يسلمكم كالعاده اغلب رحلات اوروبا تكون الساعه 1 - 2 الفجر.. اقلعنا 12ونص ووصلنا الفجر هناك .. توّها طالعه الشمس..

المهم فيه واحد مصري حق مكتب خطوط في الرياض نكبنا الله ينكبه طول حياته

قلناله فيه اوتيل في الشانز لاصق في الماريوت اسمه (نسيت اسمه) احجزلنا فيه قال طيب.. يوم وصلنا هناك قالو مافي حجز باسمكم !! عطيناه الورقه حقت الحجز قالو فيه واحد نفس الاسم ووصفلنا وينه .. المهم بعد مانـزّلنا الشنط رجعنا مره ثانيه وحمّلنا الشنط مره ثانيه .. ورحناله ويوم وصلنا.. حااامت كبدي باااااااااااااااااااايخ مررره نجمه وحده وتخب عليه!!(على قولة ابوي فنادق البطحاء افخم منه) الاوتيل هذا احلى مافيه البنت اللي تشتغل في الرسيبشن خقييت معها.. والا الباقي خاااايس يجيب الطراش.. يعني بالضبط كأني اشوف وجه دمار !!


المهم قلت لأبوي خل أهلي فيذا ونروح انا وياك ندوّر عن اوتيل في الشانز .. لأن باريس = الشانز .. والا ماتسوى !! لأن كل الخليجيين هناااك ..

المهم رحنا انا وابوي للاوتيل اللي نفس اسم هذا بس بالشانز.. وحنا عارفين ان هالوقت صيف وزحمه ومافي غرف .. المهم احساسي صار صح و قلنالهم فيه غرفه قالو لا .. قلت اوكي ميغسي


رحنا للماريوت اللي جنبه قلنا يارب.. والحمدلله طلع فيه غرفتين ودفعنا الفلوس واخذناهم

بس طبعاً الاوتيل او العزبه اللي كنا بنسكن فيها قالو ان كنسلتو الحجز بناخذ عليكم حساب يومين وحنا ماقعدنا الا ساعتين بس .. قلت ياللي تخققين لو تبين تاخذين حساب كل الأيام تفداااك بس فكّينا من اوتيلكم الخايس عكسك ياقلبي


وبالفعل اخذوا حساب يومين واخذنا الشنط مره ثانيه ورحنا للماريوت.. قسم بالله تعب.. يعني السفر بالفجر ومانمنا ويوم وصلنا قاعدين نتنقّل بالشنط من مكان لمكان ..

كرهت باريس بعد المعاناة هذي ..




المهم شي طبيعي اول ماوصلنا نمنا بعد الكرف


عاد انا خقيت مع اللوبي حقهم وهذي صورته







وهذي كم صوره للشانز اللي مزعجيننا فيه السعوديين











وهذي بوابة نابليون اللي بآخر الشانز







وبعدين حنا جينا بوقت يوم وطني مدري ذكرى وشو ومخلين انوار برج ايفل لونها ازرق.. خراافي ( هو بالعاده تصير انواره صفرااااا )












وبعدين شغلّوا فلاشات.. طالع شكله أخرف من الخرافي بععدددد







وهذا مقطع فديو للبرج مع الفلاشات :


[ame]

وهذي صور من فوق










* *




عاد شوفو ذولا البزران قاعدين بدون حركه .. كنت اتمشى انا و أمي.. انا اول ماشطفت من عندهم احسبهم مجسّـمات مادريت انهم حقيقيين .. الولد فيه الضحكه وكاتمها.. امي قاعده تستهبل عليه خخخخ








بعدها دزينا لمتحف اللوفر







طبعاً المتحف مشهور بـ لوحة الموناليزا اللي مسيومه بمليار يورو وماباعوها

حاطين الصوره بآخر المتحف وهي الوحيده اللي حاطين عليها قزاز.. لأنها قد انسرقت وانهبلوا حقين المتحف وجتهم حاله نفسيه الين لقوها ورجعوها للمتحف مره ثانيه

تمر بممرات وأسياب و درج وسلم كهربائي ومدري وشو الييين توصل للوحه هذي !!

والمتحف ماله الا مخرج واحد بس.. درج كهربائي يطلعك على الهرم اللي تو شفتوه القزاز.. وعند باب الهرم 20 كاميرا .. كل جزء بجسمك تجيبها حتى المناطق الحساسه يجيبونها خخخخ


المهم هذي صورة الموناليزا







شوفو هاللوحه وش كبرها







* *



المهم رحنا متحف فيه حدايق كبيييييره << حسيت اننا يابانيين من متحف لمتحف عكس السعوديين يجون يجلسون شهر كامل في الشانز مايطلعون منه







* *


* *


* *






GENEVA



خلصنا من باريس .. جا دور جنيف.. قررريبه مره.. ساعه في الطياره و 7 ساعات في السياره<<اقرب من خط الرياض جده



المهم انا ما ادري وش سالفة جنيف لأني ماقد رحتلها.. بس اسمع انها بحيره ومجتمعين حولها السعوديين

وطلع صدز كلامهم بحيره وحولها اوتيلااات .. انواع الخليجيين والسيارات الخليجيييه تشطف شارع البحيره يهايطون فيها بس صراحه يحقلهم يهايطون على هالسيارات



هذي صور للبحيره







شفتو الممشى اللي تحت ؟ هنا يمتشون فيه السعوديين واللحوم




وهذي صوره أقرب للممشى..






طبعاً في كرنفال سنوي يحتفلون فيه السويسريين .. مدة الكرنفال تقريباً اسبوعين..

الممشى هذا يكون على يسار الصوره كله قهاوي ومطاعم ويمين الصوره تحت عند البحيره ملاهي سيارات تصادم و التـَـقـَـدَه << الصحن الدوّار اللي يهز عرفتوه ؟ و و و و العاب كثيره مااااااره..


المهم المكان هذا مررررره زحممممه عيااال وبناااات يقعدون على الصبّات اللي بالنص ويناظرون اللي رايح واللي جاااي.. عاد السعوديات انواع الكشخه .. انتم ادرا .. لأنهم اذا كشخو.. كشخو من جد

هناااك انوااع الهبااال خاصة في سيارات التصادم.. اصدملك بنت وشبّكها << هذا نظامهم هناك

ويشغلون اغاني رقص سعوديه .. يادار وطقّتها وخذلك رقص


طبعاً الترقيم اسهل من بلع المويه .. واكيييد لا توصّوني


ماقدرت اصوّر في الزحمه كله بنات سعوديات عييييب

المهم هالصوره هذي صورتها بعد نهاية الكرنفال بيوم.. ياناس قسم بالله ملاهي وقهاوي كانت في الليل قبل لا ننام ويوم جا العصر كل شي اختفى!!! سريعييييين.. الملاهي والقهاوي يشيلونها بسياراتهم بسررعه خلال ساعات بس..!!

وليته على الألعاب والقهاوي اللي اختفت بسررعه.. الناس والعالم اللي كانو موجودين تقل جت حرب عالميه ذبحتهم كلهم مابقا الا انا وعيال عمي وخوينا و واحد مدري 2 يمشون !!!!


لأن جنيف والله ماتسوى بدون كرنفال.. واسألو اي شخص يروح هناااك..



روحو ركزو في الصوره اللي تو.. وشوفو عامود النور أول واحد جنبه درج..لأن صايرلي موقف هناااك

كان فيه ولد سعودي عند النور ومعطيني ظهره.. انا نازل بمشي من تحت مابي من فوق.. المهم يوم نزلت من الدرج والقى تحت بنت قاعد يسولف معها.. سمعت البنت تقوله انا في مدارس التربيه الاسلاميه وانت؟؟ خخخخخخ عاد هذي المدرسه بالذات لها ذكرى خاصه

طبعاً شافوني وسكتو ارتاعو.. انا كاتم الضحكه ولا عطيتهم وجه علشان ما احرجهم اكثر من كذا اصلن انا خلقه اذا مشيت ما اناظر لا يمين ولايسار .. طول عمري ثقل ياحبيلي


عاد كمّلت مشواري لنهاية البحيره رايح عند العيال علشان ماتقولون هذا موسوس يمشي لحاله




المعروف عند السعوديين انهم يروحون لجنيف ايام الكرنفال ويحجزون الطيارات على آخر يوم في الكرنفال.. كل اللي هناك 99% منهم يروحون باريس بالطياره والا بسياراتهم اللي جايبينها من ديرتهم يمسكون خط فيها

وعلشان كذا تذكرون يوم قلتلكم بداية الموضوع ان الغالب يروحون لجنيف اول بعدين باريس.. بس حنا علشاننا اول مره ماندري وش الطبخه.. رحنا باريس بعدين جنيف وقعدنا يومين بعد الكرنفال.. يلعن ام الططفششش.. قسم بالله جنيف بدون كرنفال قصدي بدون بنات ماتسوى ى ى ى ى ى


المهم ان كرنفالهم يخقق .. اول على ايام الملك فهد الله يرحمه كان هو اللي يدعم الكرنفال بمليون دولار سنوياً .. ويوم توفى صرّحت سويسرا ان الملك فهد كان صديق وداعم قوي لبلادهم


الألعاب الناريه منظمه تنظيييم خياااااااالي.. الألعاب الناريه تمشي مع الموسيقى.. الموسيقى حاطينها بـ مايكروفونات على الشوراع اللي على البحيره ومقفلين الشوارع عن السيارات علشان الناس تشوفها زين ..

المهم ان الألعاب الناريه تمشي مع الموسيقى.. يعني تسرع الموسيقى تسرع الألعاب الناريه.. واذا صارت بطيئه.. الألعاب تبطأ .. يعني بالعربي تمشي على الإيقاع وشلون ما ادري!!!


هذا مقطع فديو للألعاب الناريه البطله







لحد يدقق على الأصوات اللي تطلع هماه؟



وبكذا انتهى كرنفال جنيــف وانتهت معه الوناسه والناس من بكره سافرو كلهم ومابقا الا خليجيين ينعدّون على الأصابع ..





* *

* *

* *





INTERLAKEN




ياهي ديره


انترلاكن قريه تبعد عن جنيف 3 ساعات بالسياره .. بس طبعـاً ماراح تحس بالوقت بسبب الطبيعه الخرافيه والجو اللي يرد الروح


الزبده وحنا في الطريق من جنيف الى انترلاكن مرّينا على قرى كثيره .. شفنا مستشفى الشيخ زايد الله يرحمه بأعلى الجبل..يجونه خليجيين كثير يعالجون فيه .. ومرينا على قرية وبحيرة ايفيان (موية evian الغاليه ماغيرها) ..



المهم هذي كم صوره لإنترلاكن..









انترلاكن قريه خرافيه .. جوها روعه .. ماتوقعت ان فيها خليجيين بالشكل هذا.. سمعت ان ناس كثير يقعدون فيها 5 ايام والا اسبوع.. وانا اقول ماينلامون.. اللي يبي الطبيعه وبعيد عن هياط الخليجيين يسكن بـ انترلاكن كم يوم ..


الزبده ان أعلى قمة في اوروبا لاصقه فيها .. تقطعون تذاكر القطار منها .. الشخص تقريباً بـ 700 ريال ..


المهم ان فيه 3 قطارات تركبونها الين توصلون اعلى قمه في اوروبا.. كل قطار قوة تحمّله غير القطار الثاني وعلشان كذا مخلينهم 3 قطارات ..



وهذي الخريطه انا صوّرتها قبل لانركب القطار توضحلكم مسار القطار من البدايه الى وصول القمه


طبعاً مدة الرحله ساعتين ونص الين توصل القمه















حتى شوفو فيه كلام عند القمه المستطيل الاحمر مكتوب ( Top of Europe )



الزبده ركبنا القطار وهذي صور وحنا في الطريق للقمه .. طبيعه خياليه

















البيوووت هذولا عايشين حياة من أجمل مايكون












شوفو هالصوره .. مجرى مويه نازل من قمم الجبال المثلّجه .. من البروده طالع منها بخار مدري دخان









منظر البيوت اللي تحت من فوق الجبل








اقول ياحلوين مين يعرف هايدي؟ .. فلم كرتون رهيييب اللي بيتهم فوق الجبل ودايماً البقر حقينهم يرعون فوووق .. شوفو هالصوره .. بقر فوق الجبل يرعون تقريباً على مستوى 2000 متر فوق سطح البحر






ودك من يبسط فيذا ويجيب معه الشاهي والفصفص ويقعد بالجو الخرافي مع رذاذ المطر البارد .. وااااوك خقيييت






المهم يوم قـّربنا من القمه.. دخلنا جوا الجبل.. تقريباً قعدنا نص ساعه وحنا نمشي جوا الجبل.. المشكله ماتقدر تشوف لا يمين ولا يسار كله اسود بأسود .. صار ليل فجأه .. مافي مسافه بين القطار و الصخر حق الجبل.. مايمديك تطلّع يدك الا وانت صاقع الحجر.. النفق محفور على قد القطار بالضبط .. يعني بالعربي اللي فيه الربو والا ينكتم من الاماكن الضيقه لا يركبه .. اسود بأسود وضيييق ونص ساعه الين تخلّص المحنه



طبعاً بدأو بـ عمل النفق عام 1924 .. تقريباً قبل 85 سنه .. وقعدو يحفرون فيه 16 سنه الين خلصو ووصلو قمة الجبل.. والعمـّال اللي اشتغلو فيه 300 شخص !!



شي طبيعي قمة اوروبا لازم تكون مثلّجه .. و صوّرت صورتين وحده فاضيه والثانيه بطله لأن فيها خشّتي بس منب حاطها علشان دمار مايقول تتميلح << اصلن لو بتميلح ماطقيتله خبر .. عايش حياتي و لاهمني احد








ثللللج وغيوووووم وهدووووء غييير طبيعي مافي اي نسمة هوااااء !!!



عاد صورة خشتي طالعه تخقق واللي يبي يشوفها يسويلي آد في الفيس بوك خخخخخخ .. كلّن خق معي خخخخ (لزوم التميلح) .. فقيس كلي تبن .. بالصوره كنت لابس نص كم ماتوقعت بررد بالشكل هذا



القهر اني ماصوّرت ولاصوره للمبنى اللي قعدنا فيه فوق.. لأن امي انخفض ضغطها وداخت بسبب الارتفاع الخرافي .. لأن هذا المكان ارتفاعه 3554 متر .. يعني ارتفاعه اكثر من 3 كيلو ونص.. شوي و نحك في السما خخخخ ..

الشي اللي يقهرك لعنبو بليسهم مافي لا مستوصف ولا اي شي طبّي فوق .. طيب على الأقل يحطون احتياطات للحالات العاجله .. يبوننا نقعد ساعتين ونص الين ننزل للأرض وبعدين نروح اقرب مستشفى !!! المريض بيفطس وهو تـوّه مابعد كمّل ربع المشوار .!!

بس الحمدلله امي قعدت شوي تريّح على الكرسي وأكلت شوكلاته علشان الضغط يرجع طبيعي.. والحمدلله راحت الدوخه ..

* *


* *


* *








و بكذا يا شطـّاري انتهى الموضوع مع وصلونا لأعلى قمه في اوروبـا ..

شي طبيعي انكم انبسطتو بسواليفي .. لأن كل الناس اللي اعرفهم ما يملـّون منهـا .. ويتمنون اني اسولف عليهم كل دقيقه .. بس مشكلتي ماعندي وقــت لهـم ..



فـ يا أعزائي الكرام سوري اني تأخرت بالموضوع لأني كنت ناوي انزّله بعد الاجازه علطول بس مافضيت ..




يالله كل واحد يشكرني على مجهودي هماه ؟






وشكراًً لي أولاً وأخيرا ،،

عنوان الموضوع يابطل


لي رجعه انت وصورك
ويمكن ادعمك بكم صورة

شي شي شي

الحمدلله على السلامة معليش متأخرهـ

تصويرك بطلل

شكرا شكرا شكرا شكرا>>> دليل على حلاوت الصور

الله يعين أمك مسكينة الله يشفيها

ما أدري وش أقول بعد

الله يعافيك ما قصرتااا

ياطول موضوعك يافيصل

لي باك

ياقلبي

فيصل نسيت أقول لك شي

المقاطع ما تشتغل ليش؟؟

حق البرج والألعاب النارية

كيفك ياعمدة منت سهل
ع الموضوع الرأأأع وزين

قصدي الرحلة الجميلة

أختيارك للصور حلو ياحلو
أم البقر كو م
تر عندنا في العودة بسدير واجد
يعني بسميها جنيف ؟؟؟؟

مشكور يحلو ع الصور

اشتهيت ارركب التقدَّّه . .



(موية evian الغاليه ماغيرها )


إيه حقتي أذكررر جابوها الفاارم فتـره وقطعوها !



(لزوم التميلح) .. فقيس كلي تبن


هااه ماقلت شي

والله جهد جباآآآآآآآآر
مشكوووووووووور على الموضوع والرحله
تقبل مروري واعجابي على موضوعك الرائع
.
.
Fa90ol

يااااوك يافيصل

بنتحر وانا ارد ع الموضوع

::

بس صراحه صور وتصويير خطيييير

::

لي بااك ,, كااايد زي موضوعك ,,

::

مثبت