قاموس اهل سدير

المميز · 11-14-2008, 11:16 PM

السلام عليكم
والله مشتاق للجميع

في الايام الماضيه التحقت بالعسكريه
وكانت مده الحصار45 يوما وستخرت الله ولم اكمل
ما ابغاء اقلب المواجع ولكن تجربه فاشله وانتهة
والشاعر يقول
الله لا يعيد العســـكريه 000 والشور الي عليها حــدني
انا حر ولا لا للعبوديـــــه 000 والوطن نخدمه بشي ثاني
قصيمي بلغ ولد البدويه 000 قله الي جاني منه كفاني
انا المــــميز مانيب بنيه 000 وش ذمبي لصرت ابيضاني
الرقيب يبي مـــن حنيه 000 ولا بيخليني شبه عريانــي
يقول نفذ الامر ابن الجنيه 000 تبت يديك يا ابن العرمداني
الي اخر القصيده.....

المعاناه كانت صعبه لكن الله يرحم الحال كان الوضع مزري للغايه

الزبده اني تعرفت على ناس واجد من كل حدباً وصوب والاهم ناس من سدير

كنت ما افهم بعض كلماتهم قلت الان مسكت شي كل يوم بالمنتداء يقلون كلام
القصمان يبيلة مترجم وانتم تفهمون كلامي طيب انا ليه مافهم بعض الكلمات
يالله عطون الي عندكم وما قصرو عطوني مجموعه كلمات حلوه واتيت لانقلها فيذا
نبداء بالقاموس

ابي اسميه قاموس أهل سدير((( لغير الناطقين بها)))

لا حضت انهم يمطون آخر حرف من الفعل الماضي عند
السؤال..مثل:جيتا,رحتا,صليتا؟...الخ

أما بالنسبه للفعل المضارع..يكون بإضافة تاء زائده في أول

الفعل..مثل:تتروح,تتقهوى....الخ
( اذا صليتا هيتا تلقى العشا في البيت ) <<عبارة سديراوية بحته

قوه:هيا بنا (قوه للمسجد)

ناه: اسمع (ناه..أحاتسيك)

هماه:فهمت

هيتوا لنا: تعالوا لنا بمعني زورونا

سيروا علينا:زورونا

ماراد الله: إذا شاءالله

زمل: شايل هم

آراه وفي روايه وراااااه؟ : ليش ،ليه،لماذا؟

يويدز(يويق): يطل

باصقه: ماصله أي بمعنى بارده

صايل: معصب

انجزوا: عجلوا

حنا: نحن

يزهم: يتصل بالتلفون
ازهم على محمد خله يجي

خرع: كسر
"خرعت الشنطه كتفي"

همين: ثم=للتعقيب

تسيف : للتعجب!

دلي: سوف ;سيكون"للمستقبل القريب"
(دلي تجونا إذا سكنتوا جنبنا)

دوتس: تفضلي أي خذي
دوتس الماعون(الصحن او الطبق)

وش أمره ذا؟: ماذا دهاه؟

مشرع: <مع تشديد الراء>

ألفيت: بين الحينة والأخرى
كلما ألفيت لك يوم سير علينا
والله من الطيبه و زود الكرم
وانا عشتها شخصياً الله يذكرهم بالخير

بلى: لأن
ماجيت بلاني تعبانه

وش حيثها: وش زودها

زد: قد
زد شفتك من قبل؟

زدي الباب: ردي الباب

خنبقه:مهزله

فيذا:هنا

دزه:ادفعه

افهزدها:ابعدها
انفهدز (انفهق) : انقلع

امعطه:اسحبه بقوه

أمز:أرز يعني رزّه
سويره أطول وأمز مني

ماش:الوضع لايطمئن
ماش ماارتحت لها

مسخن:تعبان أي مريض

اهنا أحد :تفيد الاستنكار!
اهنا أحد يسوي تسذا!

دزحلت بها: حامت كبدي منها;أي مليت

اقحص: أي انهض بسرعه
يالله اقحص..كودك تلحق على الصلاه

كوده: أي عساه
ذكرت في المثال السابق

قطيشه:قطيعه
دعوه تقال عند الغضب

مير: مالقيت لها معنى
تستخدم للربط بين الجمل

يشهد الله انهم نعم الرجال وتشرفت بمعرفتهم
علماً اني استأذنت منهم لنشر الموضوع
وبالعكس اخذو رابط المنتدى وواعدوني بالرد

واخيرا اذا حسيت ان فيه احد بيزعل ساطلب من الاداره ان ترمي الموضوع بالبرحه
اخوتي واخواتي الله لا يحرمني منكم ومن كل موضوع يزيد من روابط المحبه بيننا

**يعيرونن قنو** · 11-14-2008, 11:50 PM

الحمد لله على السلامة

اول شي

ثاني شي

فيه كلمات نستعملها يالقمصان يعني مب مهجورة لأهل سدير بس-----أسرع باند

زي مثلن:

قوه

سيروا

هماه

ماراد الله

زمل

يويدز(يويق)

انجزوا

حنا

تسيف

دوتس

ألفيت

وش حيثها

قد(زد)

افهدزها

انفهدز

امعطه

أمز

مآش

مسخن

اهنااحد؟

اقحص

كوده

مير

افهم من كذا اني قصيمية مزورة::؟؟

المميز · 11-14-2008, 11:59 PM

هههههههههههه

ياختي تصدقين اني قصيمي ما سمعت الا اقحص ( اقحص لبوك ياملا المصع)
اما باقي الكلمات فيهن غرابه على العموم انا يومي صغير مرضعتني خالتي الحايليه
ممكن اضربت اسلاكي

اكيد انتي قصيميه والا حنا لطشناهن من الغالين اهل سدير

الوكاد ان زيارتك للموضوع رايقه اتحفتينا يابعد معاليقي

تستاهلين وثانيه بعد

F A I S A L · 11-15-2008, 12:44 AM

وووووووووهـ بس يا زيييييين سدييييييير ويا زيييين كلاامهاااااااااااااا

اقتباس:


	اهنا أحد :تفيد الاستنكار! اهنا أحد يسوي تسذا!

آآآآهنا أحد ؟؟ بـ مد الألف .. بمعنى فيذا أحد !!

اقتباس:

دزحلت بها: حامت كبدي منها;أي مليت

قسم بالله كلمات متعه.. موسيقى ى ى ى ى .. مثل اللغه الفرنسيه كلامها زي الموسيقى تحس انه رهيب وتنبسط على كلامهم مع انك ماتدري وش يقولون!!

مثل لهجة ديرتنا الغاليه .. لا لا ما مثل هذي الديره ..ديره

تاريخهم له في الصحايف أساطير * يشع نور بين الأسطر مداده
عادات الجمايل والاحسان * موجودةٍ في سدير في كل الأزمان
عرفوا بها في نجد من بد الأوطان * طبع تحلو به ولاهوب عاده

المميز من طوّل الغيبات جاب الغناااايم ..

الحمدلله على سلامتك والحمدلله افتكيت من وجع الراس بسبب العسكريه

لا هنت ياصديقي ،،

a7la banotah · 11-15-2008, 04:57 AM

<=كني به فيصل وهو يقرا الموضوع كشرته واصله اذانه

قنووو انسي احد يعطيك باند وانا هنا

المميز
حمد لله على السلامه

تقريبا كلامنا وكلامهم يتشابه
بس لو الله يفكنا من تعصب فيصل للسديراويين

اللمميز

دمار شامل · 11-15-2008, 07:44 AM

كلنا عيال قرية وكلن يعرف اخيه << مدري وش دخلها

اتوقع اهل نجد 90% من كلامهم متشابه تظل الفروقات في مصلحة سدير بحكم انها احسن دوله سعوديه

المميز

+روحي تحبك+ · 11-15-2008, 08:29 AM

والله لولا الله ثمن الترجمه...كــآن ما فهمت ولا كلمة...

يسلمو....المميز داااائمــآ متميز..

ونعم بسديــــر...ماعليهم زود لاهنت القبايل الثانيه...

الواااان · 11-15-2008, 10:03 AM

ســـــــــــــــــــــــــــــــــــــــــــــ ــــــــدير

اقسم بالله حتى غبااارهاا غير ( مافيه مثلها ) { جايه منها امس بالليل

والمميز كل اللي قلت صحححيح % و اقرب ناس لنا باللهجه هم القصمان ..

وموضوع مميز مثلكـ

**&أحس اني مملوحة&** · 11-15-2008, 01:35 PM

اقتباس:


	زدي الباب: ردي الباب

انا خابرتهاا زدمي الباب = قدمي الباب

وفيه ثانيه اللي هي هج الباب يعني افتحه

مره جدتي قالت لاخوي(صغير): هج الباب

عاد اخوي مافهم وراح هز الباب ويهز يهز فيه

التفتت عليه جدتي قالت : الحين انت وش مسلطك الله على هالباب

قال انتي تقولينه

**قوطي منعفط** · 11-15-2008, 02:27 PM

والله إني فاقد هالكلام وأهله

خلاص برجع ملييييييييت

مليت من همن بقلبي أشيله
ومليت من دمعن بعيني أخبيه

طال السهر والقلب زايد غليله
وطال السهر والخد بانت سواقيه

نرجع لمحور حديثنا

القاموس هذا لمنطقة نجد عمومآ

وحتى أهل حايل بعد حيي <<< مهوب عذر

ينطقون أغلب هالكلمات

الغريب في الأمر إنهم غشووووك

وما كبو الخراف<<<قل ما أعرف هالكلمه

وما قالو لك فيه كلمات مصخنه مهوب مسخنه أكثر من هذي

لدجة إن الجيل الحالي ما يعرف معناها

موضوعك جدآ روعه ومميز ومتعوب عليه

لكن في بعض المعاني وعلى قولتك الترجمه غلط

لكن مفهووومه للجميع سديراويه وغيرهم

هذي فايدة العسكريه خلتك تحتك بمجتمعك

المميز تراي فاقدك

والحمد لله على سلامتك
لك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طرق مشاهدة الموضوع
العرض العادي الانتقال إلى العرض المتطور

الذين يشاهدون محتوى الموضوع الآن : 1 ( الأعضاء 0 والزوار 1)

قاموس اهل سدير

!.. [.. الـمـجــلـــس ..] ..!