انـا و الأمير و دلاخة سمير !!

.




.



اليوم بحكي لكم معاناتي مع الاثنين هذولا ( المصري[سمير] + مرور السعوديه )

دمار وانتم بكرامه تعرفونه صح ؟ .. هذاك الانسان الهادي البريء اللي على نياته واللي يجمع كل صفات حسن الخلق .. طبعاً الصفات هذي اللي ذكرتها بالمنتدى بس ..اما برا حدّث ولا حرج .. لو تجمعون حركات عيال النسيم و النضيم كلها بشخص واحد يطلع دمار ولو تقولون لي مين ألعن عندك .. شارون والا دمار.. بقول دمار بالراحه ..



اتركو عنكم الكلام اللي فوق.. لأنها مجرّد مقدمه فقط لموضوعي

موضوعنا اليوم ياعيالي مب مضحك .. بس بطلّع اللي بقلبي من الحرّه اللي فيني من الاثنين ذولا


* اللي مستعجل رجاءاً يجي بعدين لأن الموضوع مررره طووووووويل





بسم الله توكلنا على الله ..


في هذاك اليوم الغابر كنا انا ودمار رايحين لـ دله حق مزاد اللوح .. وانا بالطريق حاط براسي أبي لوحه 6666 ..ماتهمني الحروف بقدر ماتهمنّي الستـّات الزبده دخلنا المغرب ودفعنا ألف ريال << ذيابه المرور يخلوننا ندفع علشان مانزايد وننحاش ..

بعد مادفعنا القريشات جينا بنجلس لقيت ولد خالي.. قلتله وش جابك فيذا؟ قال اللي جابني هو اللي جابك .. قلت انا جاي اشتري لوحه قال حتى انا .. قلت يالله توكلنا على الله وخلنا نجلس ... كان فيه زحمه



المهم انا قلت لدمار زايد عني مابي أخرّب أحبالي الصوتيه ..


الزبده بدأ المزاد بـ لوحة 1111 بعدين 2222 ... الين وصلو 5555 طبعاً اللي زايدوا على اللوح اللي راحت 5 - 6 أشخاص بالكثير.. انا استغربت باقي الناس ليش ساكتين!؟ قلت شكلهم جايين يتفرجون يوم جا دور الـ 6666 اشوف كل اللي جالسين قاموا يزايدون!! قلت اها ياوصخين جايين مثلي تبون الستـّات !؟

قلت معليش ياشباب السعوديه .. صح انكم تحبون الستات بس مب اكثر مني



المهم دمار ساكت ماقعد يزايد .. وبعدها بدا ينسحب واحد واحد الين يوم وصلت لـ مبلغ معين كلّن سكت .. هذا اللي معه ميكرفون قال هاه خلاص!؟ قلت دمار يالله ابدا

دمار زاد عليها.. فيه واحد طعس استقعاد ..هو الوحيد اللي بقى يزايد على اللوحه.. نزيد يجي هو يزيد.. نزيد يجي مره ثانيه يزيد.. وهكذا طوّلنا ..

قالي دمار معليش يافيصل والله ما اخليه ياخذها قلت والله ما أردّك يادمار << وبالأخير انا اللي بآكلها على وجهي وبدفع مب هو خخخخخخخخخ المهم كسبناها بالأخير ..

يلعن ام الفله يجيك شعور غريب وانت فايز.. تحس نفسك فايز بكأس العالم خخخخخ

يا لبيييه يالستات

انتهت المرحله الأولى من القصه

,’

تجديد الاستماره ونقل الملكيه

يوم شريت اللوحه وفرحان ومبسوط توني طالع من دلّه وأبي اركبها على سيارتي بسرعه .. بس للأسف سيارتي مب باسمي

رحت البيت وناديت الوالد قلتله تعال خلنا نروح لمعارض النسيم علشان ننقل السياره باسمي (هالكلام بعد العشا)

قالي لا عندي عزيمه خلها بعدين .. قلتله لا بليز يبه خلنا نروح الحين مب ضاره ربع ساعه قال ابشر.. كم فيصل عندي



المهم دزينا للمحل وقاعدين نخلص الاجرائات اللي تخص ابوي أول.. علشانه مستعجل بيمشي.. ويوم خلصناها راح.. وجلست انا..قلت للمصري أبي نفس اللوح حقتي(لأن تجديد الاستماره يخيـّرونك بين لوحه جديده خرابيط من عندهم والا نفس لوحتك بس زياده صفر من اليسار)..

المهم جا المصري وقالي فيه محل بـ جيان(التعاونيه للتأمين)<<دعايه بس مب مشكله .. المهم قالي رح للتعاونيه وطلّع تأمين باسمك قلتله طيب

رحت للتعاونيه وطلـّعت تأمين .. بعدها رجعت للمصري وعطيته التأمين.. قال تعال نروح للمعرض علشان نسوي نقل ملكيه..

رحنا للمعرض حقه وخلصنا الأوراق.. قال عليك مخالفات قلتله اكيد .. قال سددها.. قلتله ماعندي حساب لا بالراجحي ولا الرياض .. قال خلاص انا بسددها لك وتعطيني الفلوس بكره العصر اذا طلعت الاستمارات..


من بكره رحتله العصر للمحل وقالي مخالفاتك كتيره عاوزه مبلغ كبير.. قلتله كم ؟ قال 650ريال !؟

لعنبو بليسك يالمصري كم تبيها 30 والا 40 ريال؟؟ أقل مخالفه 100 ريال ..

انا يوم قالي مبلغ كبير ارتعت حسبته بالآلاف .. لأني متعود اني أخالف القانون ومخالفاتي توصل للآلاف .. استغربت يوم قالي 650 <قليله منب متعود ههههه


المهم قلت طيب بسددها.. دقيت على دمار قلتله السالفه كذا وكذا .. قال انا مجمّد حسابي بالراجحي<<وش عنده راعي المليارات خخخخخخ .. قلتله والله ماعلي منك بعطيك الفلوس ودخلها بحسابك وسددلي.. قال طيب << خاف مني


المهم اخذ الفلوس وبعد العشا اودعها بحسابه وسدد مخالفاتي.. بعدها علطول دقيت على المصري قلتله خلاص سددت المخالفات.. قال كويس خلاص ان شاء الله بكره العصر معاملتك خالصه.. قلت طيب


من بكره رحت العصر عند المصري قال ماخلصت المعامله .. قلت وراااه!!؟؟ قال فيه مخالفه بـ 100 ريال بإسم السياره(اللي هو ابوي) لأني قد مره وقفت على رصيف الجامعه ويوم طلعت لقيت مخالفه معلـّقه على مسّاحات السياره (وهقت ابوي)


دقيت على السبهه دمار مره ثانيه وقلتله سددلي حسيت انه ولي أمري .. عطيته 100 و اودعها بحسابه وسددلي ..


فاصل : المعامله طبعاً لازم يكون فيها صوره من بطاقة الأحوال.. وبطاقة الاحوال يكون مكتوب جنب رقم الهويه( عدد 1 أو 2 أو 3 ).. المهم انا حقتي رقم 1 ..


سددنا المخالفات وكلّش .. قالي سمير تعال بكره العصر ان شاء الله وتلقى كل شي مخلص قلت طيب


يوم جا بكره.. قال ماخلصت! قلت ليش؟؟ قال المرور رجعوا المعامله وقالوا نبي البطاقه رقم 1 !!! قلت طيب حقتي وشي!!؟؟ لعنبو بليسكم حمير انتم ؟؟؟ صورة بطاقة الاحوال قدام عيونكم مكتوب رقم واااحد نجيبلكم نظارات علشان تشوفون !!؟؟ قسم بالله طرططططعت
بالله مب حرام يكون عندنا ناس يشتغلون بالمرور مايعرفون رياضيات ؟؟


المهم سمير قال خلاص انا بكلم المعقـّب يكلمهم بكره .. وان شاء الله بكره العصر تخلص قلت طيب


يوم جيت عنده من بكره .. ضبّطوا حقّت الرقم واحد الحمدلله شافوها .. بس الله يلعنهم لا بارك الله فيهم ولا باللي حطهّم تدرون وش المشكله الجديده بعد؟؟ كتبوا اسمي في الاستماره فيصل بن فلان بن فلان الـ فلاني << كتبو اسمي كله صح الا (العائله) .. حطّولي عائله جديده من راسهم !!؟

بالله عليكم قد شفتوا أدلخ وأسبك وأسبـَه من مرور السعوديه !!؟ مايعرفون رياضيات ويسجلون اسم واحد ويحطونه بعائله ثانيه غير عائلته !!!!

انا طفح فيني الكيل<متعوب عليها .. دقيت على دمار قلتله السالفه كذا وكذا .. قال مرّني وخلنا نروح عند سمير بعد العشا .. قلتله طيب


المهم رحنا عند سمير الصعيدي.. المهم دمار عرّفه على نفسه قاله معك الأمير دمار والسبهه المصري صدّق تشوفونه قمط وارتبك قاله اهلن اهلن ياباشا ازيك عامل ايه؟ اخبارك مدري وشو خخخخخخخخخخ

المهم فزعتي قاعد يهاوش سمير وسمير قامط .. والله ياهو مرتبككككككك رحمته هههههههههههههههههههه ..

بعد كلام طويل عريض قال ان شاء الله بكره العصر تكون جاهزه قلنا طيب.. يوم جينا بنطلع من المكتب .. سمير قال لدمار مع السلامه ياباشا !! .... وانا مالي رب !!؟ مافي مع السلامه و لا شي؟



جيناه من بكره وأخيييييييراً طلعت الاستماره مابغغغغغت يلعن امها عمليـّه قيصريّـه متعبه جداً .. جا سمير قال لازم نرجّع الاستماره للمرور مره ثانيه علشان يختمون عليها !! قلت حيوان انت!! وشوله تجيبها طيب دامها ماخلصت!!؟؟ قال لازم هذا نظام المرور يختمون على الاستماره وتطلع وبعدين نرجعها يختمون عليها من مرور ثاني!!؟؟



وشوله هالتعقيد هذا بالنظام !!؟ وين التصاريح اللي يقولون فيها تسهيل اجرائات المرور ومدري وشو!!؟ الله يلعنكم انتم واجرائاتكم


المهم هماني طالب بتجديد الاستماره نفس اللوحه القديمه بس زياده صفر من اليسار..قال اللوحه والاستماره يبيلهم 15 يوم علشان يطلعون هذا نظام المرور.. لهم وجه يحطون نظام بعد؟ قلت طيب الشكوى لله


طبعاً انا كنت ابي نفس لوحتي علشانها مميزه ومابيها تروح علي اذا ركـّبت اللوحه الجديده اللي شاريها من المزاد.. علشان كذا ابي تطلع اللوحه القديمه بسرعه علشان انقلها لسيارة ثانيه في البيت..

المهم هذا الكلام يوم الثلاثاء بالليل .. قلت معليش والله منب منتظر أكثر من كذا انا خرمااااااااااااان وأبي اروح للبحرين خخخخخخخ ..

دقيت على ابوي قلتله دبرلنا فيتامين واو قال طيب.. عطاني رقم واحد وقال دق عليه وقلّه اللي تبيه .. قلتله شكراً يا أكوس أبو في الدنيا



دقيت على الرجال.. طلع قصمنجي بححححت .. كلام القصمان فللله يقعدون يمطمطون في الكلمه الوحده ساعتين تقل يتكلمون بالحركه البطيئه خخخخخخ


المهم قلت للرجال السالفه وياليت تطلع اللوحه بدري مستعجل عليها ابي اركب لوحتي الجديده .. قال ابشر يافيصل يوم جا من بكره الصباح(الاربعاء) دق علي وانا بالجامعه قال ترا اللوحه جاهزه الحين بالمرور رح خذها من عندهم.. قلتله شكراً يا أحسن واحد في العالم

علطول سحبت على ابو المحاظرات الباقيه ودزّيت للمرور .. دخلت عندهم قلتلهم عندكم لوحه باسم فلان الفلاني(اللي هو انا) مخلصه أبيها ..

المهم جاب اللوحه وعطانياها وبيده الملف .. قلتله والاستماره وينها!؟ قال الاستماره الموجوده بالملف حقك الاستماره القديمه !! قال رح عند المعقب حقك وقله ان الاستماره الجديده مب موجوده (المعقب اللي يقصده هو اللي يتعامل معه سمير) دقيت على سمير قلتله ياتبن وين معقبك؟ قال ادخل المبنى (المهم وصفلي مكانه) رحتله قلتله السالفه كذا وكذا.. قال مب معقوله ! اصلن ماتطلع اللوحه الا بالاستماره الجديده! انا شكّيت قلت يمكن ماشاف الصفر اللي على اليسار ويحسبها القديمه قال المعقب ارجعله وقله ماعندي شي!


رجعت للعسكري اللي عطاني اللوحه وقلتله المعقب يقول انها معكم.. قال الملف عندي تبيني اجيبه لك تشوفه؟ قلتله ايه ياليت لوسمحت! قال وش قصدك يعني انا كذاب!!!؟ قلت لا والله وش دعوه حاشاك بس يمكن ماشفت الصفر قال لا ماعندي شي ارجع للمعقب!!

الحين يقول اجيبلك الملف تشوفه وبعدين يقول وش قصدك يعني انا كذاب!!؟ يلعن ابو نفسيّتكم ياشيخ

رجعت للمعقب وقلتله العسكري يقول ماعندي شي ارجع للمعقب! هذا الكلام وقت اذان الظهر..

قال رح صل وانا بدخل عنده وبشوف وش السالفه؟ قلت طيب المهم صليت الظهر ورجعت للمعقب قال انا كلمته وقالي اني حطيت الملف جوا كراتين وصعبه افتحها الحين ..

قال المعقب انا بجي الخميس الصبح وأدور على الملف و رقمني قال دق علي يوم الخميس ..

دقيت عليه الخميس الصباح مقفل جواله العصر مقفل المغرب مقفل .. تصريفته حلوه عطاني الرقم علشان يسكتّني


يوم جا السبت دقيت عليه رد قلتله ادق عليك مقفل قال ايه انا كنت مشغول.. قلت اها طيب..وش صار على الاستماره بس؟ قال دورتها ومالقيتها دق علي بعد ساعه بدورها مره ثانيه..

دقيت عليه مايرد! عطيت رقمه ابوي يتفاهم معه لأني صراحه لو بتفاهم بتطاق معه دق عليه ابوي و رد!!

قاله ابوي انت قلت لولدي يدق عليك ودق ولارديت.. قال مادق علي! قلت الله يلعنك واللي يدق عليك مره ثانيه..

قال لأبوي بكره بدور عليها مره ثانيه..

الفيتامين واو و نقل لوحتي القديمه الى سيارة البيت علشان اركب لوحتي اللي شاريها

انا يوم شفت الدعوه بالمهزله هذي قلت منّة الله ولا منّة خلقه .. دقيت على خويي اللي احسن واحد في العالم قلتله السالفه كلها من طق طق الى السلام عليكم ..


قال شف المهازل هذي مب جديده! يوم قالي كذا (تذكرت المرور يوم يقولون ان اجرائتهم سهله وميسّره للمواطن!!!!!) قالي خويي انت جهزلي أوراقك كلها وأوراق السياره الثانيه علشان أخلصها لك.. يعني بيطلّع استماره بدل فاقد وبـ يبدل اللوح من سيارتي للسياره الثانيه.. قلتله طيب..

المهم خويي القصمنجي دق علي العشا وقال وين تبينا نتقابل علشان تعطيني الأوراق؟ قلتله اللي يريّحك.. قال تعرف ولاية تكساس منفوحه؟

قلتله أسمع فيها بس ماعمري طبّيتها ولا اعرف مكانها أصلن قال وش دعوه ؟ في احد مايعرف قلب الرياض النابض؟خخخخخ قلت ايه هين ..


المهم وصفلي ولاية تكساس وطبعاً كتبت وصيـّتي قبل لا اروح.. لأني خايف اروح ولا ارجع


المهم رحتله وعطيته الأوراق وقالي ان شاء الله بكره بيخلّص كل شي انا خلاص معد صرت أصدّق كلامهم قلت طيب


يوم جا بكره الظهر دق علي مارديت كنت نايم .. دقيت عليه العصر مايرد المغرب مايرد العشا مايرد .. قلت لأبوي دق عليه خلاص معد فيني حيل.. أعصابي تعبت


الزبده كنت تارك جوالي بغرفتي .. دق عليه ابوي وانا عنده .. رد عليه والله ابوي له هيبه يردون عليه وانا معطيني الخامس

المهم ابوي قاله فيصل يدق عليك من العصر ولا ترد.. قال توني داق عليه ومارد! المهم ابوي عطاني اكلمه.. قال يامزعج ماتنام انت؟ <<ام المو انه حسيت اني اعرفه من قبل 3 سنوات ..

القصمان ذولا فله يذبّون وجههم علطول خخخخ المهم قالي دقيت عليك قبل شوي ولا رديت قلت جوالي مب معي.. قال المهم يالله تعال لولاية تكساس نفس مكانا أمس كل شي مخللللللص.. قلت معليش منب مصدق الين اشوف بعيوني<< والله انرحم


رحت عنده ولقيته مطلّع الاستماره وحاط لوحتي بالسياره الثانيه ولوحة السياره الثانيه بسيارتي .. قلت اممممممووووااااه ياشيييييخ روح الله يستر عليك ويزوّجك حرررريم الين تشبع خخخخخخخخ



خلاص يعني الحين كل شي جاهز مابقا الا اني أروح لمرور الناصريه وأعطيهم الوصل حق اللوحه اللي شاريها ويعطوني اللوحه وخلاااااااص



هذا الكلام يوم الأحد بالليل.. قلت لازم أخلصها الاسبوع هذا لأني ابي اروح البحرررررررررين علشان استمتع فيذاك


المهم رحت لمرور الناصريه الاثنين الصباح.. أخذت ملفي معي(حسيت اني رايح أقـدّم على وظيفه) دخلت مبنى اللوحات ورحت عند الريسبشن حقهم.. قلتله انا شاري لوحه من المزاد ومعي الوصل حقها.. وشلون آخذها!؟

قال هات الملف..عطيته الملف واشوفه قاعد يناظرني قاط معي(شكـّيت بنفسي ) قالي مواليد كم انت؟(شكله بيخطبني ) قلتله مواليد ألف وأربع ميه و سر


اشوف واحد جنبي قال ياحليلك توّك صغير !!! خييير وش تبون انتم؟؟ واحد يبي يخطبني والثاني يقولي ياحليلك توك صغير !!؟


المهم حق الريسبشن قالي شف مكتب المدير هذاك طق عليه الباب وادخل قلتله طيب بس فكـّني منكم ..

رحت للمدير حقهم وخلاني أوقع على ورقه وقال رح سدد في الصراف وتعال قلت طيب ..

هذا الكلام على الساعه 10 رحت للصراف حقهم لقيت طابور فيه 30 ألف واحد قاعد أفكّر أصف سرا والا لا؟؟

الا شوي وجت سيارة البنك ودخلوا الخوال وقالوا يالله اطلعوا بنسوّي صيانه للجهاز تعالوا بعد صلاة الظهر.. قلت ياسلام عليكم جيتوا بوقتكم اصلن انا مالي خلق اصف سرا ..


قلت مافي الا اني ارجع للجامعه احضر محاظرة الساعه 11 وأرجعلهم بكره..


وانا بالطريق بطلع من المرور ماشي.. اشوف واحد جاي من بعيد وهو يناظرني (انا ماشي طالع وهو جاي داخل) المهم يوم قرّب من عندي قال نظارتك حلوه!! طبعاً انا سفهته مارديت عليه حتى ماناظرته بعد قاعد اناظر قدام(ياحبيلي طول عمري ثقل ) ..


المهم كملت طريقي وطلعت ..وانا بالطريق قريب من الجامعه دقيت على ولد خالي اللي كان موجود بالمزاد.. قلتله ياخي يلعن ام القرف زحمه غير طبيعيه على الصراف عندك حل ثاني؟؟ قال ايه شفت اللي قبل ماتدخل مبنى اللوحات فيه ناس عند الباب اللي يقولون تسديد - تأمين - ملفات - مدري وشو قلتله ايه وش فيهم؟ قال رح عند واحد منهم وقله أبي اسدد..


يقول انا سويت كذا خليتهم يسددون لي.. يدقون على رقم ومدري وش يسوون ويسددونه بالجوال!؟ قلت يلعن ام التطور يالسعوديين تسديد فلوس بالجوال بدون لاتدفع فلوس خخخخخخخخ .. قلت طيب وش يضمنلي انه سدد ؟ يقول هو يحطلك سبيكر وبيرد جهاز يقول تمّت عملية التسديد بنجاح.. اذا جاك كذا يعني خلاص تسددت..


قلت يلعن ام المشوار يعني برجع للناصريه مره ثانيه قعدت أفكر شوي.. قلت ياولد الدعوه فيها بحرين كللش يهون لعيونها وأرجع أصك مشوار مره ثانيه للناصريه..


دخلت المرور طبعاً لسا الطريق طويل شوي قبل لا اوصل للمبنى المطلوب ..وانا بالطريق اللي شفت فيه ابو نظاره حلوه.. قسمن بالله وانا بالطريق داخل اشوفه جاي بوجهي بيطلع .. قلت يلعن ام الحاله ياكثره المهم انا امشي يوم قربنا من بعض قاعد يناديني يابو الشباب لو سمحت.. ماعطييييييته وووجه قاعد امشي بطريقي..


قلت الحمدلله اننا بالنهار مب بالليل علشان الشرف مايضيع لأن الشرف أهم شي بحياة الانسااان خخخخخ


المهم سفهته وكمّلت مشواري عند الناس اللي يقولون تسديد تأمين تنصيب ..


وصلت عندهم ورحت عند واحد منهم قلتله أبيك تسددلي .. قال وش نوع التسديد؟ قلتله لوحه مزاد .. قال 400 ريال.. و40 تعبي قلت لو 100 بس سدد مابي أصف سرا لو ايييييش.. دق على الشي المتطور حقهم وحطلي سبيكر وسمعت ان العميله تمت بنجاح وعطيته 450 ..


رحت عند العساكر وقلتلهم خلاص سددت .. قال وين لوح سيارتك القديمه؟ قلتلهم بالسياره قال رح جبهم ماتستلم اللوح الجديده الا اذا جبتها.. قلت لا ياناس تكفون ارحموني شوي قسم بالله بعيييييد ومابي اشوف مره ثانيه ابو نظاره حلوه


قلت الشكوى لله أرجع وأجيب اللوح واعطيهم اياها .. بس الحمدلله ماشفت ابو نظاره حلوه وانا راجع


* واحد يبي يخطبني والثاني يقولي ياحليلك صغير والثالث يقولي نظارتك حلوه!!!!!؟ الزبده اني رجعت واخذت لوح السياره وعطيتهم اياها وعطوني اللوح الجديده اللي شريتها ..


ووووووووووووجع مابغت تخلّص محنتي معهم قسم بالله منب مصدق اني خلاص خلصت كل شي!! منب مصدق يعني خلاص بروح البحرين خخخخخخخخخ


يوم وصلت للسياره دقيت على دمار اول مارد قلت والله ماعلي منك لازم تسويلي حفله بعد المعاناة حقتي .. هو ماصدّق انها خلصت قال منب مصدقك الين اشوفها بعيوني راكبه بالسياره خخخخخخ



/

\

/

\

/





فيه سالفه صغيره قاهرتني مالها دخل بالموضوع بس بقولها ابوي ارسلني اخلص لوحة سيارة البيت رحت لمرور الروضه وقت صلاة الظهر..

المهم انا و ناس معي قاعدين عند الباب ننتظرهم يفتحون.. اشوف واحد جاي من بعيد (يزورق بين الناس) الين وصل عندي .. سألني يقول مابعد فتحوا الباب!؟ قلت غبي انت!؟ ماتشوف الباب مسكر والناس هذولا قدامك قاعدين ينتظرونهم يفتحون!؟

قسم بالله ناس ما ادري وشلون تفكـّر !!

لا اصبرو بعد ليته وقفت على هذي وبس..

فيه مبنى جديد قاعد ينبني جنبهم.. قالي هذا المبنى تبعهم!!؟؟؟؟؟

وش درّا اهل اهلي انا!!!؟


ياناس وش اسوي بحالي؟؟ أذبح نفسي!!؟؟





انا شكلي مره ثانيه اذا رحت لمكان عام بعلـّق لوحه على جبهتي مكتوب عليها هذا المستخدم لا يمكنه الكلام الآن فضلاً اقلب وجهك خخخخخخخ






مايستفاد من القصه :

1- هاجر من السعوديه

2- لا عمرك تفكر تطلع لوحه مميزه

3- كم مره قلت المهم في القصه؟

4- منفوحه = ولاية تكساس بعيون أهلها خخخخخخ ( القرد في عين أمه غزال )

5- الوسيمين لا يطلعون من بيتهم .. علشان كذا انا حرّمت اطلع من بيتي الا للأشياء الضروريه مثل الجامعه

6- شكراً لي



.

هههههههههههههههههههههههههههههه
ههههههههههههههههههههههههههههههههههههههههههه
احسن شي تجلس بديرتك وبلاش لوحات مميزه وخرابيط
ههههههه يسعدك رربي فصوله

ثاني

لي عوده عقب ما يخف وجع راسي


برب

لي باك مع التهزيء يا حقير